今年三月喺北京召開嘅人大、政協，有啲人大代表就提出議案，認為中國文字之中嘅正體字應該喺大陸恢復行使。正體字一般人就以為係繁體字，其實繁體字呢種說法係錯咖，因為「繁」本身就有一個貶義喺度，本來非簡體嘅中國漢語方塊字係非常之帶有音樂味、同埋圖畫味嘅一種文字，世界獨一無二！
有人話如果宜家恢復正體字，就要投放大量嘅資源，就會令到成個國家同埋社會覺得好煩，又要重新適應，所以呢啲人係反對恢復使用正體字。呢種咁嘅論點，邏輯上就極為荒謬，因為如果話當你食咗海洛英，或者毒癮甚深，宜家政府想派你入去，叫你入去呢個療養院度，幫你戒毒，你會唔會話，要我重新戒過毒，做番個正常人，要在牀上滾來滾去、食美沙酮、慘受刮骨之痛，咁麻煩都係唔好戒喇？
嗰種聲稱反對恢復行使正體字，因為行政費用龐大，呢種論點其荒謬之處，與當你沾染毒癖之後，要戒毒所需要中間經受嘅痛苦同埋麻煩，係令人痛不欲生，所以不如唔好戒毒，你話係咪一樣咁荒謬呢？
(本聲音專欄只反映主持人及個別參與人士的個人意見。)