高清881 高清903 am864 infomation
01.10.2016
  1. 節目區
  2. 新聲上載
  3. 聲音專欄
  4. 節目主持
  5. 節目表
  6. 網上直播
  7. 節目重溫
  8. Apps
債務股本比率 Debt to equity ratio
11.04.2012 15:49
 

睇一份業績嘅時候,想知道嗰間公司嘅償債能力,就要留意債務股本比率。呢個比率嘅公式係將公司嘅總負債除以股東權益。佢係用嚟衡量公司嘅財務槓杆。比率越高,借貸水準相對股東權益越高,公司風險越大,財政狀況便值得關注。
 
至於債務股本比率喺咩水平先至係健康,就無一定嘅標準,但可以從兩方面去衡量。第一,先將公司同同類股票比較,睇下個間公司嘅負債比率係咪低過同行嘅平均負債比率。以行業劃分作比較,好處係可以因應唔同行業嘅投資金額嚟衡量,例如基建股、地產股等投資金額較多,負債比率亦都較高,而銀行股嘅負債比率由於投入金額較小,負債比率相對較低。
 
第二個方法就係因應市況嘅變動,對債務股本比率作不同衡量。如果係牛市,即使比率高,只要公司盈利能力同埋效率高嘅話,盈利回報亦都會相應增長,債務股本比率就唔係一個主要考慮因素。不過如果係熊市,債務股本比率高嘅股票會受市況、息率上升等因素拖累,股價表現可能會受到衝擊,而本來被視為進取嘅作風,亦都會被市場負面看待,因為市場會認為公司投資愈大,壞帳機會愈大。反而一啲負債比率低嘅股票,喺呢啲市況之下,會較受市場追捧。
 
再睇下玖龍紙業,從佢上個月公佈嘅2011年中期業績計出嚟,債務股本比率有百分之117。公司董事長張茵就預期比率已經見頂,2012年底會降至百分之100、明年6月會進一步再降至百分之90。對於呢個預測,我哋就拭目以待啦。




關於商台 服務條款 免責聲明 私隱政策 廣告服務
聯絡我們 FAQ 版權 加入我們