高清881 高清903 am864 infomation
01.10.2016
  1. 節目區
  2. 新聲上載
  3. 聲音專欄
  4. 節目主持
  5. 節目表
  6. 網上直播
  7. 節目重溫
  8. Apps
不良貸款 Non-Performing Loan
20.04.2012 16:18
 

雖然西班牙拍債反應唔錯,集資額超過預期上限,不過當地銀行二月份嘅不良貸款比率就升到去18年嘅新高百分之8.16。

 

不良貸款就係有問題嘅貸款,如果借款人未能按原定嘅貸款協議按時償還商業銀行嘅貸款本息,或者已經有跡象表明借款人唔可能償還貸款本息而形成嘅貸款。而不良貸款比率係指問題貸款佔整體貸款嘅比率。

 

而不良貸款嘅增加係有一定機會形成壞帳。當發生壞帳嘅時候,企業就需要將虧蝕金額喺資產負債表到剔除。呢個動作就係撇帳。撇帳之後,資產值或者盈利都會下跌。

 

如果企業出現大規模撇帳,就會減低公司本身嘅資產充足比率,削弱咗財務實力,拖累整體業績表現。有啲企業或者會出現一次性撇帳,咁呢筆壞帳就只會影響嗰一季嘅盈利表現而唔會拖累下一季嘅表現。不過,如果公司有能力作足夠減值撥備嘅話,市場反而唔會擔心有關撥備會喺第二年再次浮現出嚟,拖累未來嘅走勢表現。假如撥備足夠嘅話,而已作撥備嘅資產價格卻回升,公司就會出售資產,而所得盈利就會列入特殊項目入面撥回,有助支持公司嘅盈利增長。

 

西班牙銀行不良貸款比率趨勢不斷上升,壞帳機會大大提高,究竟呢個問題最終如何善後呢,就等我哋拭目以待啦。




關於商台 服務條款 免責聲明 私隱政策 廣告服務
聯絡我們 FAQ 版權 加入我們