高清881 高清903 am864 infomation
28.09.2016
  1. 節目區
  2. 新聲上載
  3. 聲音專欄
  4. 節目主持
  5. 節目表
  6. 網上直播
  7. 節目重溫
  8. Apps
供股 Rights issue
06.02.2013 17:16
 
上一次我地講過配股,稍為比較配股同供股既分別,今次再詳細D講供股。
 
供股就係上市公司新印股票比現有股東認購,股東可以按持股比例認購新股。而公司之所以供股集資,原因可以係為咗作新既投資,又或者減債。如果股東唔參與供股,咁手上既股權比例就會遭到攤薄。常見既供股方式有二供一,即係原有股東手持每兩股舊股,就可以有權去購買多一股新股。
 
一般散戶都會將供股睇成一種負面既公司行動,因為唔係所有股東都願意作出更多投資。而當公司宣告供股時,現有股東都會收到供股權。如果股東唔想供股,可以放棄呢個權利,或者喺市場上將供股權沽出套現。供股權可以喺聯交所買賣,不過壽命較短,通常只有一至兩星期。情況就好似以前領取食物需要買飯票一樣,如果唔想領取食物,就可以將飯票轉贈或者賣比其他人。
 
如果公司有充分理由去供股,例如作新投資,而新投資預計可以增加公司盈利,咁供股未必係一件壞事,因為供股之後,公司既盈利會因為新增投資而增加,對股價有好處,令股價上升。
 
而家市況比起上年有轉變,好多公司都會借勢喺市場集資。如果散戶手持既股票有配股或者供股既行動,最緊要就係留意下公司既集資用途啦。



關於商台 服務條款 免責聲明 私隱政策 廣告服務
聯絡我們 FAQ 版權 加入我們