【商台互動國際組】唔少人都對神秘莫測嘅外星人同不明飛行物體感興趣，例如多年前本港某電視台播出嘅一套解剖外星人「紀錄片」，當時就引起咗社會極大哄動。近日，有美國嘅航宇員就喺美國國家記者會(National Press Club)嘅新聞發布會上堅稱的而且確有UFO存在，仲呼籲美國政府公開相關檔案，事件得到唔少人學界中人嘅支持。
現年78歲嘅美國阿波羅14號宇航員艾加米切爾（Edgar Mitchell）喺發布會上指出，外星人確實已多次接觸過人類，但美國太空總署(NASA)一直隱瞞真相，佢仲話61年前喺新墨西哥州羅斯威爾發生嘅UFO墜毀事件確有其事。佢更加指出其實而家好多國家都已經公開咗UFO嘅檔案，美國政府好應該採取效法佢哋，將掩飾咗多年嘅真相公開俾大眾知道。
另一位78歲嘅美國飛行員米爾頓託利斯(Milton Torres)就話，佢喺1957年嘅一次緊急嘅升空任務中親眼見過UFO，仲向對方開火。佢憾述當時雷達探測到一個「疑似飛行航空母艦」嘅不明物體，佢靜止咗喺太空度好耐，然後突然間極速移動，並於瞬間消失得無影無縱。不過就如艾加米切爾所言，佢係事後被一位身份不明嘅人士警告要對事件保持緘默。
此外，除咗航宇員力證UFO存在外，亦有科學家以實證支持依啲講法。羅傑雷爾( Roger Leir)醫生就表示佢曾經喺一啲「疑似被外星人綁架過」嘅人身上取出十幾種唔屬於地球嘅金屬物質，而且人體組織對依類金屬毫無排異反應，籍此可見外星生命確實嚟過地球。
會上發言嘅仲包括前英國國防部官員、負責調查UFO事件嘅尼克波普(Nick Pope)，同埋前美國有線新聞網(CNN)著名主持人謝理爾鍾斯(Cheryll Jones)，佢哋都同樣希望美國政府可以盡快將絕密檔案公諸於世。 |