【商台互動國際組】有睇過《魔戒》嘅朋友可能都會記得電影裡面嗰個矮小、腳短、毛多嘅哈比人，最近考古學家發現，依個由作者托爾金（J. R. R. Tolkien）虛構出嚟嘅人物原來確實喺世上存在過，並且仲有可能係人類嘅始祖。
2003年，考古學家喺印尼佛羅勒斯島發現一種身高僅得3尺6吋、體重約300公斤，頭腦只得400立方公分嘅史前小矮人骨骸。經過各方多年研究，科學家認為依種矮小嘅佛羅勒斯人，應該係人類嘅始祖，佢哋係為咗適應島上生活演變成「侏儒」。
托爾金喺《魔戒》裡面亦提到，哈比人身高約2至4尺，有尖尖嘅耳朵，短而捲曲嘅頭髮，常年深居於迷霧嘅山脈、山坡洞穴中，性格羞怯而堅強。托爾金仲將哈比人設定為同人類大有關聯，同依次考古學家嘅發現甚為相似。
學界人士指，當年哈比人嘅頭顱只等於現代人嘅三分之一咁大，其後人類嘅頭骨點解會產生咁劇烈嘅演變呢？目前依個問題正引發起無數人嘅爭辯。 |