【商台互動國際組】「大堡醮管理員」依份「全球最筍工作」已經名花有主，不過其實好工又何止一份呢？今日我哋就為大家選出三份可以同「大堡醮管理員」相提並論嘅筍工介紹俾大家：
最美筍工 男人至愛
對於一眾男士嚟講，一份人工高，又成日有美女睇嘅工作好有可能係佢哋最理想嘅工作。咁正嘅工而家正由巴西一名叫做阿米迪亞嘅藝術家擔任緊，原來喺巴西嘅狂歡節日期間，好多熱情奔放、身材火辣嘅森巴女郎都中意喺身上畫一啲紋身或彩繪。當然唔係「阿豬阿狗」都可以喺靚女身上「遊走」喇，所以身為藝術家嘅阿米迪亞就十分吃香，好多美貌少女都會上門俾佢喺身上畫出漂亮圖案。
雖則阿米迪亞本身只係以藝術為出發點，但能夠喺咁多美女身上繪圖，仲可以一睹佢哋引人嘅身軀，令男士們羨慕非常。更何況每完成一幅作品佢只需要兩小時左右，就已經可以收到660英鎊作酬勞，怪不得當佢招聘一名助手嘅時候收到大量嘅應徵查詢，相信佢要搵一名穩妥、正派嘅助手都要花唔少時間選擇！
最冬筍工 大把錢剩同事好
南極考察站較早前招聘咗一班電工，雖然話要喺冰天雪地做嘢，但就可以領取到年薪23000英鎊，仲包埋免費食宿，可以話係全世界正努力工作嘅「師傅」們發夢都唔想像唔到嘅良好待遇。
據現在擔任緊依份工嘅49歲工人麥克勞蘭所講，由於四處無嘢好買，而所有生活開銷已經由考察站支付，故此佢可以話係賺幾多儲幾多。更何況喺果度工作嘅全部都係研究人員，既有學識人品亦好、對工作又熱心，所以做依份工令佢非常開心。
最舒適筍工 睡眠一定足
而獲得我地評選為全球最令人難以置信筍工嘅，就係一連鎖旅館嘅「睡眠工程師」，依一班「睡眠工程師」嘅工作非常舒適，只要每個禮拜去到世界各地嘅旅館，測試床舖舒唔舒服，喺上面瞓返3、4次覺，再提出意見就可以領取薪水！
現時任職「睡眠工程師」麥卡倫就表示，需要與同事們研究各種方法，令住客可以瞓得好，享用充足睡眠。不過有時候佢哋都唔會好大陣仗咁設計床舖，而係好簡單咁更換一下床套，就已經可以好神奇地大大提升顧客嘅睡眠質量。不過，最令人驚訝嘅始終都係一份咁舒適嘅工作，年薪竟達6萬英鎊之高，相信稱之為全世界嘅頭號筍工，要搵人嚟反駁都唔係咁易！