高清881 高清903 am864 infomation
16.07.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps
體育 | 體育新聞

球壇包公:阿仙奴又吼西維爾翼

02.12.2009 17:25

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

阿仙奴
回顧番04年,當時阿仙奴睇中咗西維爾嘅快馬雷恩斯,不惜動用1,700萬鎊收購;初頭呢位西班牙翼鋒都踢得好地地,點知突然患思鄉病要求離隊,搞到領隊雲格頭都大埋。好喇,事隔5年,最近又傳出雲格想以2,000萬鎊,買斷西維爾位21歲阿根廷翼鋒柏洛迪,今次驚唔驚又入錯貨呀?

我球壇包公不嬲八盡世界足壇,西維爾出晒名盛產翼鋒,唔計當年嘅雷恩斯,家陣仲有捷西斯拿華斯、迪亞高卡普、艾迪安奴、甚至近期最紅嘅柏洛迪都係擅打邊線,隻隻都係快翼。仲有不得不提早年不幸喺球場猝死嘅佩亞達,都係翼鋒出身o架!

阿仙奴今次食過翻尋味,又向西維爾啲小將快翼打主意,我球壇包公只怕柏洛迪又會行番雷恩斯條舊路,畢竟只得21歲咋。聽講柏洛迪份合約嘅買斷價係2,000萬鎊,兵工廠出價嘅同時,又要同曼城拗手瓜;講錢邊隊會夠曼城多,好彩今次唔係鬥錢,因有買斷價呢條條款,只要柏洛迪自己想去邊就得喇。話時話,除咗紅軍嘅恩素亞外,有幾多阿根廷球員可以喺英超聯立足?

伊度奧親細佬「降呢」踢西乙
正所謂同人唔同命,兩兄弟由同一個阿媽生,際遇都可以好迥異。伊度奧踢巴塞隆拿嗰陣贏過西甲、歐聯、西盃,家陣轉踢意甲都叫做效力國際米蘭呢啲大球會。佢親細佬伊天伊度奧事業就爭幾廿皮喇,上季完咗西甲馬略卡即時放棄咗佢,搞到一直未有班落;日前20歲嘅伊天伊度奧終於搵到棲身之地,呢位喀麥隆U20代表啱啱同西乙球會塔拉戈納簽咗約,家陣球隊排緊12位(22隊),要爭升班上西甲有排咯。

杜奧巴過意甲落班?
車路士前鋒杜奧巴想去意大利搵食?係呀,球迷絕對冇聽錯,不過只係10年內嘅事。話晒杜奧巴家陣事業如日中天,幫車仔排緊英超聯榜首,點會無啦啦轉投意甲發展呢?呢位31歲嘅科特迪瓦射手就話:「我啱啱同車路士續咗3年約,雖然大把意大利同西班牙球會想斟我,但現階段梗係唔會走人啦。」不過杜奧巴話好鍾意意大利,遲吓一定會去嗰度發展,但只係未來10年嘅事。佢仲話到時老到應該踢唔到波,做訓練員係佢心願喎。


 Tag   阿仙奴   雷恩斯   西維爾   柏洛迪   曼城   伊度奧   杜奧巴   車路士   馬略卡  
日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們