【商台互動國際組】好Out啊！宅男、宅女、電車男、乾物女，以上全部都係一啲說明日本社會現象嘅用詞，不過正所謂時移世易，喺該國已經不斷「生產」咗唔少新潮語，繼我哋之前介紹過用嚟形容「超級慳家男生」嘅便當男、優男之後，今日我哋會再為大家帶來一個日本另一新興潮語——「草食男」。
「草食男」並唔係指「食齋嘅男士」，而係指嗰啲同食草動物一樣，性格溫順，非常注重個人形象，而年齡介乎喺20至30歲之間，作風有啲女性化嘅男士。專家指「草食男」出現嘅原因係由於泡沫經濟爆破，唔少男士對未來失去咗信心同鬥志，而日本近年又過於太平盛世，男士夢亦唔再追求勇猛、奮勇戰鬥嘅傳統形象。
「草食男」主要可歸結為5大特徵：一、佢哋唔在意工作，無乜上進心；二、對fashion具有高敏感度，平時會節食keep fit、著緊身衫；、同媽咪嘅關係比較親密，經常一齊去shopping掃貨；四、對女性無乜興趣，亦唔多考慮結婚生仔(據傳依種特徵間接令日本安全套生產公司生意下跌)；五、隨身帶住好多會員卡、優惠券，生活十分精打細算──簡言以曰之，其實同時下嘅女性好相似。
據最近嘅調查發現，喺500名受訪男士中共有378人試過被朋友指係「草食男」，足見依股風潮可謂大行其道。對於已經進入老齡化社會嘅日本而言，有人難免為此一社會現象擔憂；不過亦都有人指出，「草食男」其實講明好多日本男性已經拋棄咗「大男人主義」嘅舊有思想，亦未尚唔係一件好事。