高清881 高清903 am864 infomation
18.06.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps
 
 
 
 
免費睇動物買少見少 
02.04.2009        
     

四隻由中央政府送俾香港嘅小熊貓,月底就會喺海洋公園同安安、佳佳、盈盈、樂樂做鄰居,同市民見面嘞。其實,唔少香港人都中意去動物園睇動物嘅,近年一有新動物嚟香港都會掀起一股熱潮。由水母到中華鱘,由大熊貓到小熊貓,都令公園排哂長龍嘅。
 
入場費超過200蚊嘅海洋公園,飼養嘅動物就越嚟越多喇,咁唔使錢嘅政府設施又點呢?《雷霆一擊》向康文署查詢,佢哋屬下嘅動植物公園,原來一共有70隻哺乳類動物同埋80隻爬蟲類動物;屯門公園就飼養咗60隻爬蟲類動物;香港公園亦都有蝴蝶館同觀鳥園嘅,加埋漁護署屬下嘅濕地公園,市民要免費觀賞動物嘅話,咁其實都幾方便嘅。
 
不過,康文署飼養嘅動物,呢幾年就好似買少見少喇。舊年已經有飼養多年嘅美洲豹同埋紅毛猩猩,老死咗喺動植物公園裏面。而動植物公園飼養鸚鵡嘅鳥籠,喺舊年十月又被傳媒發現有老鼠出沒喎,令人懷疑康文署其實有無心去飼養動物咖。
 
《雷霆一擊》向康文署查詢佢哋飼養動物嘅情況,佢哋回覆話每年大概用180萬蚊,同埋25個員工去到照顧呢啲動物。不過,佢哋喺書面回覆就話「本署並沒有購買新動物嘅計畫」。
 
動物死左,但係又唔補充,而公園唔少動物亦都係養咗十幾廿十年咖喇,咁即係話康文署係有計畫咁樣淘汰現有嘅動物喇。好似話紅毛猩猩咁啊,原來係由1978年已經開始住喺動植物公園裏面咖喇,而針鼴同埋袋鼠,就喺80年代開始住嘅.仲有雲豹同埋藪貓,都係90年代搬入去。有咁多咁大年紀嘅動物住喺裏面,咁我哋就覺得動植物公園似動物嘅善終服務多啲喎。
 
《雷霆一擊》認為,既然康文署似乎係要將啲動物淘汰,其實大可以將呢啲動物交俾一個好似海洋公園,同埋嘉道理農場呢啲機構去繼續飼養啊。不過我哋向康文署查詢嘅時候,佢哋又自稱話,佢哋已經有照顧動物嘅豐富經驗,仲喺國際上面有重要嘅保育地位,係唔可以由其他機構代替嘅。
 
即係話,康文署既唔會發展現有嘅動物園,但係又唔會將飼養動物嘅資源交俾其他機構喎。換句話嚟到講,宜家康文署屬下嘅動物公園將會係日漸萎縮,市民要免費睇動物,或者真係只能夠去馬騮山睇馬騮喇。
 
其實香港嘅野生動物種類好多咖,雀鳥嘅種類可以講係全球數一數二添,而香港嘅郊外就有接近500種雀鳥、200幾種蝴蝶、同埋百幾種蜻蜓。生態教育及資源中心總監程思浩話,我哋喺香港其實有好多地方可以欣賞到呢啲野生動物嘅……
 
程思浩補充話,睇動物唔一定要去動物公園,喺郊外睇野生動物其實仲有意義……
 
去郊外固然可以睇到好多野生動物喇,不過動物園亦都係一個市民可以好好欣賞動物嘅地方咖,雖然海洋公園一樣有好多動物,但係唔係個個市民都可以負擔到200蚊嘅入場費嘅。其實政府應該檢討一下,佢哋放喺飼養動物嘅資源,係咪真係用得其所,宜家康文署屬下嘅動物係咪接受得最好嘅照顧呢?如果可以將佢哋交俾專門照顧稀有動物嘅機構嘅話,再將啲資源放喺呢啲機構上面,咁市民就真係可以用平嘅價錢,可以睇到一啲珍貴嘅動物喇。

(本聲音專欄只反映主持人及個別參與人士的個人意見。)

 
 
中國法國床頭打交床尾和
03.04.2009
免費睇動物買少見少
02.04.2009
簡約生活不簡單
01.04.2009
鬼網要小心
31.03.2009
粗口咪亂講
30.03.2009
香港駐台辦事處逼在眉睫
27.03.2009
已經有0位網友作出回應

 
姓名: 雷霆一擊小組
真名/別名: 雷霆一擊小組
生日:
星座:
 

DJ:
欄目:
     



關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們