高清881 高清903 am864 infomation
23.09.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps

劉鳴煒到底講咗乜?

22.05.2015 16:40

富商劉鑾雄之子、華人置業主席劉鳴煒,早前以青年事務委員會主席身份接受前有線新聞報道員張寶華之訪問,片段於網上影視平台 GoYeah 播出後,旋即惹來坊間莫大迴響,據說全因劉氏的一番「月儲三千蚊就可買樓」論,激怒了無數置業無望的年青人。

小弟碰巧在「抽劉鳴煒水大行動」前,已看過此片,卻沒印象他說過「月儲三千蚊就可買樓」或「睇少啲戲去少啲日本就可買樓」等傻言瘋語,但既然大家都這麼說了,他也自然這麼說過,或許是小弟記性不妙,也可能是小弟領悟力特別不高,於是特意再看一遍,並筆錄了涉及「儲三千蚊可買樓」的訪問內容,至於他原本的意思是甚麼,大家不妨自行定奪:


「......最關鍵係預備好、裝備好自己,搵到一份固定、人工唔錯嘅工作,有冇能力讓你儲錢。當一個人係萬五蚊月薪,你如果而家係洗盡哂或者淨返一千蚊,你願唔願意作出啲犧牲,睇少啲戲、去少啲日本?

(主持:但佢哋覺得而家就算唔食、食麵包,都買唔到樓?)

唔好講買唔買到樓住,就算樓價跌返落嚟,你如果唔願意喺你嘅 personal budget 儲多啲錢,樓價跌幾多你都係儲得嚟有排。個問題係,而家啲人願意喺萬五嘅月薪犧牲幾多擺銀行儲首期?願意犧牲五百蚊吖,定係犧牲三千蚊吖,定係幾多?

我地上一代係願意犧牲好多。而家大家個個其實係有好多消費上嘅需要,買最新嘅智能手機、去旅行,其實普及化咗,多咗嘢要去消費。以前我同你阿爸阿媽個年代,冇 iphone、冇得去日本旅行,少咗消費要去花錢。你樓價由而家跌兩成、跌三成、跌四成,個 point 係你都要儲首期,而你儲得快、儲得慢有兩個 factor,第一個 factor 係個樓價幾多,樓價幾高幾低啦;第二個 factor 就係你喺你月薪裡面肯犧牲幾多出嚟儲。樓價跌哂落嚟,你唔肯犧牲,唔肯儲三千蚊......萬五儲三千嘅話,淨係肯儲五百蚊嘅話,你咪儲得慢過三千蚊果位囉!

(主持:所以你覺得其實佢哋只要肯盡量少洗,你覺得佢哋可以搞得掂嘅,可以上到車嘅?)

我唔想誤導人,我意思係你唔做我頭先講啲嘢,個樓價跌幾多都冇用。呢一 part 唔發生 [樓價跌],件事都唔會成嘅,但呢一 part 發生咗,你自己又唔肯儲錢,你淨係可能每個月撥開五百蚊儲首期,你係有排都 [買唔到]。某程度上,果個 [上到車嘅] 快與慢就喺你控制範圍內。

有啲人就會話,睇唔到樓市跌,就唔好預備。睇唔到樓市跌......洗哂佢算勒,點做都做唔到。呢個咁嘅態度我覺得係唔正確嘅。我覺得就算 [樓價] 跌落黎,最受惠、[可以] 上車上樓嘅人士,就係預備好、裝備好自己嘅人士......」


小弟絕無意為劉鳴煒這種人辯護,青年事務委員會是怎麼回事、劉氏又是靠甚麼上位,相信大家心中有數,其實他在訪問中亦談過關於「地產霸權」的議題,而他僅因為地產市場有 75% 是二手樓交易,卻只有 25% 屬新樓買賣,便聲稱樓價高企主要不是大地產商造成,就頗教人不敢苟同,但凡事要分清楚,有人五行欠插,不代表我們有權明屈,就算面對無恥之徒,我們亦應贏得光明磊落,才不至落得與對方同一層次。

公道而言,坊間的說法也不能完全算是明屈,就算劉鳴煒的意思只是「肯儲錢總比不肯儲錢的人更快買到樓」,又或是「買唔到樓一半原因係大家唔肯儲錢」,仍然十分值得斟酌,因為一個發達且健康的社會,是不應讓普羅大眾需長年放棄合理程度下的消費,才能買得起最便宜的物業,只是在爭取更公義制度的同時,尤其是批評既得利益者或當權者的言論之際,宜多加注意有否扭曲對方的說法,哪怕是最輕微的扭曲,否則只怕招人口實,被有心人加以利用。

(圖片由作者提供,文章不反映本台立場。)


曼谷發紅警 天津呢?

假面超人

驊哥,一路好走!

劉鳴煒到底講咗乜?

接近神的男人

不愛 7up 的白毛女

字裡維新 | 星級推介
 
字裡維新
 

關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們