高清881 高清903 am864 infomation
20.01.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:艾迪巴約「人間有情」

23.11.2009 17:40

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:


艾迪巴約
好多人覺得,今夏過檔曼城嘅艾迪巴約喺9月對阿仙奴時,特登入完波跑幾廿碼衝向兵工廠球迷慶祝,係一個好衰嘅做法。我球壇包公一向公私分明,專講公道說話,我就覺得既然各為其主,入波唔慶祝要忍住嘅,不如唔好踢!其實呀,呢位多哥前鋒幾有人情味o架!

話說愛爾蘭啱啱喺世盃附加賽,俾亨利嘅「大帝之手」玩死,搞到緣盡決賽周,門將基雲梗係冇晒心機啦!呢位曼城門神,好彩喺球會仲有大把隊友安慰,艾迪巴約就第一個以行動表示愛意。佢喺更衣室第一個帶頭攬住基雲,跟住比拿美等隊友排隊上前又攬又慰問,基雲當堂冧鬼晒。

艾迪巴約話:「我哋同基雲講,成班隊友日日驚佢唔開心,知佢好難受,於是話佢聽唔係孤軍作戰,因為我哋係一家人,係好朋友嘅就要共患難。」艾迪巴約做嘅嘢骨唔骨痺見仁見智,我包公就覺得好warm喎,果然係曼城自己友態度即刻唔同晒。


歷高達利「禁慾」記
大賽之前,唔少教練都要求球員禁慾,但可能無人想到,會有人自己為自己「禁慾」。34歲嘅祖雲達斯後衛歷高達利,自己話同卡卡一樣係虔誠教徒,堅拒反對婚前性行為,同靚靚女友艾莉卡行埋3年幾,竟然自爆二人從未翻雲覆雨,實令不少新一代對性觀念開放的年輕人「眼凸O嘴」。

且聽虔誠教徒歷高達利點講:「我同女友一起時會愛撫同埋錫錫,但不會進行婚前性行爲,就像卡卡一樣,我贊同佢嘅做法,要知道新婚之夜同妻子首試風雨交融,確是是人生一大樂事。小時候,我甚至不曾接觸過色情刊物,也不會看三級片同埋賭錢。」包公唔想說教,好嘅應該學,唔好就咪亂學,年青人,你哋知點做啦!


C朗歐聯搵蘇黎世熱身半粒鐘
皇馬嚟緊周三就會喺歐聯C組,主場對住同組最弱嘅蘇黎世。唔好話我球壇包公睇低呢隊瑞士超代表,佢哋無疑小組喺聖西路贏過AC米蘭,但查實班波真係好水皮,要贏佢哋有幾難吖?唔怪得皇馬搵蘇黎世試陣喎,聽講養傷咗54日嘅C朗,日前操足成課其足踝都唔覺得痛,教練柏歷堅尼打算派C朗上陣30分鐘,畀佢當熱吓身,等呢位缺席咗球會10場比賽嘅葡萄牙國腳,可以29日對巴塞時更有狀態嘛。講堅,蘇黎世呢啲咁嘅魚腩,最啱C朗落場郁兩郁鬆吓筋骨啦。

 

「體盡世界」吹水blog已經推出,留言論盡今天體壇新聞、趣聞!
http://sport.blog.my903.com


日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們