高清881 高清903 am864 infomation
18.01.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:維迪怕凍欲離紅魔?

25.11.2009 17:46

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

尼曼查維迪
我球壇包公勢估唔到,未加盟曼聯前仲係踢俄超莫斯科斯巴達?中堅尼曼查維迪,竟然會因為曼徹斯特市天氣較凍,而唔肯同紅魔續新約,仲想走人!俄羅斯?天氣一向係冰天雪地,呢位28歲守將都頂得順,家陣竟然因為驚凍而想離隊?哦,原來係佢老婆安娜怕凍至?。

而家嚟緊成70,000鎊周薪嘅維迪,同中路拍檔里奧費迪南堪稱最夾,令領隊費sir好鬼放心。之但係到嚟出年1月或者夏天,兩個隨時冇得做隊友。里奧家陣養緊傷,最快要到出年先可以復出,搞到費爵爺已經好頭痛;最近維迪又唔係同球會續約,原因係佢老婆話唔慣曼徹斯特市天氣,想轉去西班牙嗰邊居住先舒服喎。

我球壇包公真係唔明安娜點諗,以前維迪住俄羅斯都夠晒凍啦,相比下06年過到曼聯暖好多啦,點知都仲係唔慣。錫老婆?維迪當然抵讚,佢2012年合約就會屆滿,紅魔為免人財兩失,賣走呢位塞爾維亞中堅咪一舉兩得囉。維迪,我撐你以家庭為重o架!

操波唔好戴鑽石
球壇包公有時覺得金錢真係會令人腐化,好似呢一代球星小小年紀已經擁有千萬家財,根本唔會有基本嘅理財觀念,或者懂得珍惜身邊事物,仲越來越浮誇,同唔少內地暴發戶大款冇乜分別。

皇馬球員德倫特日前就在訓練上,唔見咗隻鑽石耳環,只知道其價值比起一部普通牌子私家車仲貴,可憐包公入咗呢行一段時間,都儲唔到錢買車。訓練結束後,德倫特一個人在草地上起勢咁搵,作地氊式搜索,到頭來都係得個「吉」,講真球場咁大要搵隻指甲咁細嘅耳環,仲難過利物浦後上攞英超,只係唔明咁貴重又點解要戴去球場同隊友耀武揚威,實實際際踢場好波啦!唔通銀河艦隊內嘅球星,正如名校學生一樣必須帶「XV」書包返學證明自己地位?

卡斯拿斯破硬簡尼歐聯紀錄
今晚皇馬歐聯迎擊蘇黎世,將會係門將卡斯拿斯第100次歐聯上陣,假如臨場無恙可把關,呢位西班牙隊長將成球會史上第3人創此紀錄,之前魯爾同卡路士早已達里程碑。

前拜仁門將簡尼,暫以107場歐聯上陣次數做緊紀錄保持者,佢都忍唔住大讚卡斯拿斯:「呢個紀錄保唔住啦,佢反應快,接高空波又一流,我就踢到38歲掛靴,我估佢歐聯踢到160至170場。」卡斯拿斯冇傷又唔使停賽嘅話,打到入歐聯決賽啱啱好破到簡尼紀錄喎!

 

 

「體盡世界」吹水blog已經推出,留言論盡今天體壇新聞、趣聞!
http://sport.blog.my903.com


 Tag   尼曼查維迪   卡斯拿斯   皇家馬德里   簡尼   曼聯   歐聯   德倫特  
日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們