高清881 高清903 am864 infomation
28.01.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:伯金恨做前鋒訓練員

26.11.2009 17:27

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

伯金
前阿仙奴名將伯金,06年掛靴之後一直優哉悠哉,呢位世界頂級射手早前接受荷蘭雜誌《JFK》就話,暫時都無意做領隊一職,反而對做前鋒訓練員好有興趣喎。40歲嘅伯金咁講:「領隊工作暫時唔啱我住,你哋知啦,做領隊又要返屋企睇波做功課,又要24小時on call,又要四圍飛,又要搞球隊操練,呢啲唔啱我o架!」

原來伯金嫌麻煩,唔想咁多嘢跟身,笑死我球壇包公咯!哈!講真吖,伯金呢啲咁頂級嘅射手,上一代有幾多好似佢咁瀟灑!作為球迷,梗係想睇佢重返球壇啦,唔踢波睇吓佢着住老西,教吓波都好嘛。伯金跟住再同記者講:「我想喺英格蘭工作,尤其想做前鋒訓練員,幫一啲有潛質嘅年輕射手,等佢哋入多啲波。」唉,最衰我球壇包公一早超晒齡,唔係我實報名跟伯金學嘢!


拉科教頭以死威脅唔準賣人
拉科魯尼亞今屆喺西甲做咗黑馬,家陣排緊聯賽第5位,都咪話唔犀利。隊員踢得好就好自然成別會嘅獵物,好似古亞達度、菲臘路爾斯同里基等主力,都傳過阿仙奴、巴塞等頂級球會爭住想要。點知拉科教頭洛天拿一聽到愛將被挖角,就以死威脅話唔準賣人:「我啲隊員踢得好俾人睇中,我梗係開心啦,但假如要賣走我啲愛將,得!除非我賣咗鹹鴨蛋啦!」唔知洛天拿仇家多唔多呢?係就出價買佢啲球員嚇吓佢囉!


阿仙奴小將紋錯身要做手術
江湖片《古惑仔》入面啲大佬都講過:「紋身係一世嘅,紋咗就冇得返轉頭。」時代唔同晒,家陣科技高到連紋身都可以清除。阿仙奴小將左閘阿曼特查奧爾,佢話自己做咗伊斯蘭教徒,而教規一向唔準世人傷害自己身體,所以呢位20歲後生仔計劃喺球季完結之後,走去做手術整甩個紋身。佢話:「我唔應該走去紋身o架,係我一生其中最錯嘅事!」查奧仔你咁虔誠,教會實原諒你嘅。


日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們