高清881 高清903 am864 infomation
20.01.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:些路迪簽「謝拉特」

27.11.2009 17:21

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

寄誠庸:我係謝拉特,唔係中村俊輔
蘇超班霸些路迪,啱啱由FC首爾簽入南韓仔中場寄誠庸,亞洲球員嚟到蘇格蘭,尤其仲要些路迪o添,球迷梗係會用佢嚟同日本嘅中村俊輔比較。話晒中村喺些路迪踢到成個大佬咁,簡直係球隊代表人物,家陣雖然離咗隊遠赴西甲愛斯賓奴發展,但好多球迷仲愛爆呢位舊將o架。

聽講寄誠庸身價都唔平,使咗些路迪成400萬歐元,嚟緊12月尾就可以正式加盟。講真我球壇包公就未睇過呢位20歲中場踢波,但去韓國旅行嗰陣都聽過佢個朵,原來國民叫佢做「南韓謝拉特」,你話笑死唔笑死!

寄誠庸就話成日搵佢同中村俊輔相比,好大壓力喎:「嚟到些路迪,肯定俾人話我係『新中村俊輔』啦,但我唔係囉,只係大家都係亞洲人啫。」寄誠庸仲話國內球迷o益佢做「新謝拉特」,咁樣佢受落啲喎。佢再講:「我又後生、又速度快、又大隻,邊似中村俊輔?我覺得自己踢法係謝拉特囉!」唉,誠庸仔,似邊個又點吖?你攞到個正選位先再講啦好冇?

朗拿度放水畀愛隊爭標?
巴甲鬥入最後直路,榜首聖保羅62分,次席法林明高61分,國體會同彭美拉斯就齊齊59分,而聯賽淨番兩輪咁大把。眾所周知朗拿度雖出身自高士路,但查實最愛球會係法林明高,今周佢效力嘅哥連泰斯,咁啱主場對呢支兒時愛隊,假如佢哋擊敗法軍,咁就令對手肯定追唔到聖保羅爭標。法軍射手阿祖安奴話:「朗拿度話自己係法林明高忠實球迷,佢點忍心愛隊爭標路要主宰喺佢手上?」賽前阿祖咁識捉對家心理,唔通「大哨」真係會放水?

「小活佛」迪拉彭拿季尾掛靴
球壇又將有一位好波之人掛靴喇!我球壇包公一向好欣賞有「小活佛」之稱嘅迪拉彭拿,覺得佢雖然細細粒,由光頭仔踢到變光到佬,但仍然好有星味。家陣效力愛斯賓奴嘅迪拉彭拿,係巴塞隆拿嘅青訓產品,嗰陣佢踢巴塞經已好搶鏡。可惜呢位「小活佛」完全冇少林寺嘅功夫底子,多年嚟成日受傷,98年過檔拉素又係冇作為,02年返西甲踢愛斯賓奴叫做重拾昔日光輝。33歲嘅佢同教練普捷天奴傾完計後,決定喺季尾高掛波砵,心傷!「小活佛」話:「我連操練都唔得喇,我只係想比賽,完成合約。」


 Tag   謝拉特   朗拿度   迪拉彭拿   寄誠庸   些路迪  
日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們