高清881 高清903 am864 infomation
19.01.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:堅尼迷信定亂吹水?

01.12.2009 17:30

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

堅尼
前曼聯硬漢堅尼,做球員嗰陣確實係位世界頂級球員,但講到做領隊,我球壇包公就覺得佢冇乜料到喇。堅尼教英超新特蘭嗰時成績唔係太好,家陣轉教英冠葉士域治,都只係排緊聯賽尾3嘅22位。睇番葉士域治開季踢咗14輪仍然未開齋,直頭第15周先叫贏到打比郡獲首勝,堅尼做領隊有幾多料,心照啦。

近期老葉成績轉好,上周日作客卡迪夫城半場落後0:1,最後尾段憑史迪同約拿芬禾達斯嘅入球反勝2:1,贏得相當驚險。堅尼話之所以贏到場波,全靠佢上周六親自走咗入去卡迪夫城嘅千禧球場,睇澳洲對威爾斯場欖球賽,最後澳洲隊以33:12贏咗。堅尼話呢場波畀到個特別靈感佢,所以最後可以反勝喎。

吓?堅尼兄,呢場係欖球比賽,你踢嗰瓣係足球嚟噃,關咩事先?咪喺度吹水唔抹咀先得o架!你可以話因此而加深對球場嘅熟悉,又可以話踢之前入一入千禧球場,腳頭會好啲咁嘅藉口,我球壇包公都順啲。你話贏波關場欖球比賽事?牽強啲啩!

賓施馬輸打吡再撞車當黑
皇馬啱啱喺西班牙「國家打吡」演出討好,無奈都要輸畀伊巴球靚波,你哋可能怪責C朗接應卡卡門前唔入,我球壇包公就怨後備入替嘅賓施馬,接應角球門前幾碼高出多啲!不過算啦,賓施馬都夠晒黑仔喇,輸完場打吡之後,呢位法國射手揸車離開時,又遇上交通意外,我都唔好意思再鬧佢。聽講好彩賓施馬揸得好慢,炒咗埋幾間酒吧度,佢架車就嚴重損毀要報銷,不過佢本人就咩事都冇,咁都冇受傷真係要還神咯!法國傳媒仲話賓施馬心事重重,嚟到皇馬發展好唔如意,仲打算1月重返里昂喎。

維度卡冇班落想返澳洲踢波
澳洲牛維度卡喺球員當打時期,入球率真係嚇鬼死人,無論佢效力薩格勒布、些路迪、列斯聯或米杜士堡嗰陣,都成日見到佢入波。不過自從紐卡素今季降落英冠後,維度卡亦俾球會放棄咗,家陣呢位34歲前澳洲國腳,都仍然冇球會落班。最近終於有維度卡嘅消息,原來佢想返家鄉踢澳職墨爾本勝利,順便喺度正式完成職業足球員生涯。其實澳職聯近年都有好多英超球員嚟到呢度發展,好似前阿仙奴中場龍格保、前利物浦射手科拿同前曼聯前鋒約基咁,個個都有新發展。澳洲係維度卡老家,更加冇問題啦。


 Tag   葉士域治   賓施馬   皇家馬德里   維度卡   堅尼  
日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們