高清881 高清903 am864 infomation
02.07.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:尼維特告別賽將舉行

16.12.2009 17:42

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

「鐵人」尼維特仍愛戀祖記
有球壇「鐵人」之稱嘅尼維特,今夏終於掛靴,佢眼見前球會祖雲達斯喺歐聯分組出局,都不禁搖頭嘆息。嚟緊尼維特將重返都靈奧林匹克球場踢告別賽,由佢率領嘅歐洲明星隊,會對住由杜奧巴帶領嘅非洲明星隊,場面肯定極為感動。

即將重返久地,尼維特少不免又被記住圍住問問題,呢位03年歐洲足球先生就話:「能夠重返主場踢波梗係開心啦!加上呢場又當係慈善賽,所以我即刻應承出戰。」聽講呢隊歐洲明星隊嘅陣容,仲包括球王施丹同門將佩雷斯等幾位前祖記成員。

尼維特嘅引退,「老婦人」由雲達不來梅搵咗迪亞高做接班人,即使兩位球星擔任位置唔同。尼維特好謙虛咁話:「而家祖記嘅陣容,比起上季我在陣時更強;幾時着住呢件黑白間條波衫都會好大壓力,包括我在內,迪亞高只係需要時間適應,我建議他唔好放棄。」

華朗重返拉素再戰意甲?
足球壇永遠都係個充滿驚喜嘅地方,大家每年都會搵到超新星,又可能突然見到16歲嘅新天才出現,老將鹹魚翻生更加係今年大熱嘅潮流話題。先唔好計曼聯越踢越勁嘅傑斯,佢位前隊友、現年34歲嘅阿根廷中場華朗一樣踢到翻生,佢效力嘅學生隊啱啱喺世冠盃4強2:1淘汰咗浦項制鐵殺入決賽,嚟緊好大機會同巴塞隆拿爭冠軍。華朗34歲又係越踢越勁,搞到前球會拉素有意搵佢回巢救亡;聽《米蘭體育報》啲意大利行家爆料,話拉素等埋世冠盃完結之後,就會同華朗接觸,假如雙方同意轉會,肯定係意甲球壇福份!

法比仔好想喺魯營踢波
英超嚟緊聖誕開快車,好多位領隊都擔心自己唔夠兵用,話晒賽程咁密,有乜球員受傷就唔好啦。阿仙奴領隊雲格早排先講完,唔想放法比加斯返西班牙踢友賽,但呢位隊長似乎唔聽話,話自己實對到阿根廷喎。法比仔話:「今晚對完般尼,就會喺周六再對侯城,但之後27號先再對維拉,中間成個禮拜空檔期,我梗返西班牙踢對阿根廷嘅友賽啦。」計我球壇包公估計,因為呢場友賽安排喺巴塞隆拿嘅魯營球場上演,法比仔恨去巴塞好耐喇,仲唔趁今次機會同「主場」球迷打聲招呼咩?


 Tag   尼維特   杜奧巴   祖雲達斯   華朗   拉素   阿仙奴   法比加斯  
日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們