高清881 高清903 am864 infomation
03.04.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:祖記軍醫累死自己友

17.12.2009 18:03

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

甘莫蘭尼斯長唞俾祖記累死
意甲勁旅祖雲達斯近期戰績好差,歐聯分組出局,聯賽又啱啱輸完畀巴里,傷兵名單又水蛇春咁長,十足十俾人落咗邪降一樣。甘莫蘭尼斯大腿肌肉嚴重受創,聽講真係踵到成隻豬蹄咁;原本呢位意大利國腳其實唔使咁受苦,佢經理人就投訴祖記軍醫喺度亂咁醫甘仔,令到傷勢加重!

連意大利傳媒都話,甘莫蘭尼斯一早應該將受傷部份嘅瘀血吸晒出嚟,咁隻腳會冇咁痛冇咁踵,衰在祖記軍醫喺好後期先知!唉,家陣甘莫蘭尼斯如果做手術,至少要唞4個月先可以跑步;就算唔做手術,等嗰幾處撕裂嘅肌肉自己好番,同樣都要休息3個月。

換言之,甘莫蘭尼斯下年3、4月復出得嚟,意甲都差唔多收「咧」;最慘係世盃決賽周6月開鑼,甘仔又一向係意大利國家隊嘅主力,到時納比唔選佢入隊,都唔知佢嬲唔嬲祖雲達斯好咯。

中村俊輔玩唔掂西甲返日本
喺蘇超些路迪威足幾季嘅日本中場中村俊輔,今夏過檔西甲愛斯賓奴後一沉不起,話佢久久未能適應西班牙生活,影響埋踢波嘅心情。教練普捷天奴就話:「好奇怪!估唔到中村用咗幾個月時間,都唔慣喺西班牙生活,唉!」聽啲傳媒講,中村俊輔已決定咗出年6月走人,講真吖,冇心機踢波咪盞令自己早啲掛靴,寧願走人踢多幾年開心波好過啦。中村預計踢完世盃,就會重返日職聯,31歲喇,唔通仲有歐洲球會肯簽佢咩?費事簽完佢又話生活習慣唔協調啦!

路爾斯華倫西亞不再自閉
今夏由韋根以1,600萬鎊加盟曼聯嘅路爾斯華倫西亞,今季喺各項賽事加埋經已入咗6球波;季前領隊費sir預咗佢全季入10球,睇嚟超標唔難。睇番路爾斯華倫西亞自08年1月正式加盟韋根後,所有賽事踢咗52場,但都只係入得嗰6球,加盟紅魔後總算交到功課。費sir仲話華倫西亞嚟到曼聯後唔鍾意講嘢,成日玩自閉;家陣呢位厄瓜多爾國腳見幫球隊入到波,連費sir都話佢變咗開籠雀。華倫西亞仲識得同記者講笑:「我踢韋根咁耐,如果計埋球會操練嘅,我諗總共入過7球啩!」


日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們