高清881 高清903 am864 infomation
05.04.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:范志毅睇死陳肇麒

18.12.2009 17:40

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

香港隊啱啱捧走東亞運金牌,有「香港C7」之稱嘅陳肇麒更加係風頭躉,無論體育版或娛樂版都見到佢嘅踪影。我球壇包公其實都幾欣賞陳肇麒,話晒係香港球員,竟然唔使靠關係去踢伯明翰(班主係港商楊家誠),都得到熱刺嘅邀請去跟操試腳。唔簽做職業球員就預咗o架喇,但總算係港人嘅驕傲。之不過,前中國國家隊隊長范志毅,就大潑冷水話C7唔夠班喺英超立足。

根據內地啲行家同包公講,話范大將軍覺得好多中國年輕新星,質素都比陳肇麒好。范志毅話:「呢位球員(指C7)我都帶過,佢應該同毛劍卿及郜林佢哋差唔多年紀;陳肇麒身體條件唔錯o架,不過同毛劍卿幾位國內球員相比,仲係有一段距離嘅。」聽范大將軍咁講,C7嘅質素好一般咋喎。

此外,范志毅仲話C7如果繼續踢港甲,呢幾年都唔會有好大進步喎。將軍繼續講:「聽講佢去過熱刺試腳,但我唔想潑佢冷水呀,佢應該無法喺英超立足。」再轉頭傳出上海申花想簽C7,范志毅話一啲都唔知情,只係求其一句:「希望佢成功啦!哈!」

卡路士歐洲球壇最後一天
費倫巴治周四喺歐霸盃分組最後一輪,主場1:0擊敗舒列夫,喺H組首名出線32強,相信係歡送巴西左閘卡路士嘅最佳禮物。呢位前巴西重炮國腳,兩日後就會約滿費倫巴治,呢場係佢嘅告別賽,亦係告別15年歐洲球壇嘅最後一場波。按照慣例,卡路士喺89分鐘俾費倫巴治換走,等佢可以接受主場球迷嘅祝賀。卡路士早前同哥連泰斯簽咗兩年合約,實行再同「大哨」朗拿度做隊友;曾效力皇馬、國米等大會嘅卡路士,今次返老家巴西踢到掛靴,人生總算無憾啦。

美羅費古路亞與施丹同級?
韋根上周六作客賽和史篤城2:2,左閘美羅費古路亞快開罰球,半場60幾碼左腳笠入咗龍門,即時聲名大噪,聽聞熱刺都想斟佢。韋根領隊馬天尼斯就話,佢睇波咁耐,只有02年歐聯決賽,施丹球不着地凌空窩利抽射,幫皇馬入奠勝球贏利華古遜捧盃嗰一球,可以同美羅費古路亞呢球相提並論喎。我球壇包公聽完之後得啖笑囉!同球王施丹比?咪笑死人好喎!馬天尼斯解釋:「純以技術層面去睇,佢哋兩位嘅足球sense係直頭一樣。」球迷聽完之後有咩感覺?


日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們