高清881 高清903 am864 infomation
30.03.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:意國腳為慈善露兩點

21.12.2009 17:31

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

意大利國腳拍半裸年曆
做得足球員,身型一定操得好鬼弗,尤其露出上身嗰兩嚿大胸肌,更加可換嚟9成女性嘅尖叫聲!效力祖雲達斯嘅中堅簡拿華路,日前為咗自己搞嘅「簡拿華路個人慈善基金」籌款,係咁見晒啲意大利國腳陪佢做模特兒,拍攝一輯2010年嘅「剝衫大年曆」。

正所謂做慈善不遺餘力,吳剛師父何嘗唔使搽晒油剝晒衫,喺東華節目玩食炭?今次由「大簡」為首做慈善,聽講成輯年曆要赤裸上身露晒兩點,性感就梗o架喇,女性見到就肯定會留晒鼻血!簡拿華路近年雖然冇乜頭髮轉咗skin head造型,唔前以前嗰把鬈而長嘅頭髮咁飄逸;不過「大簡」身型仍然操得好弗,兩嚿大胸肌加6嚿朱古力型嘅腹肌,仍然齊晒o架!

簡拿華路貴為意大利國家隊隊長,號召力梗係勁啦,聽講其餘意大利國腳好似東尼、基拿甸奴同馬特拉斯等都有份拍年曆。莫講話女粉絲爭住要,連我球壇包公都要買本珍藏下啦!

美斯贏世冠盃得罪國民
巴塞隆拿啱啱喺世冠盃決賽,以2:1反勝學生隊,幫巴塞加時射入奠勝球嘅,仲要係阿根廷球王美斯!話晒學生隊係阿根廷國內勁旅,美斯身為阿根廷人,今次仲親手喺世冠盃擊敗自己嘅家鄉球會,梗係換嚟國民嘅公憤。聽講學生隊失落世冠盃後,有好多國內粉絲上街「示威」,並喺牆上面大玩塗鴉,寫住「美斯唔係阿根廷人!」我球壇包公好明白學生隊球迷嘅舉動,但美斯身為巴塞球員,唔通特登唔入波咩?出年6月世盃決賽周,假如美斯幫阿根廷勇奪冠軍嘅話,我唔信佢唔係國家英雄囉!

拉素不敵國米俾傳媒狂寸
伊度奧上半場嘅入球,幫國際米蘭喺周日主場1:0擊敗拉素,齋睇個戰果,拉素好似僅僅輸個馬鼻,但賽後意大利傳媒狂笑狂寸呢支羅馬市球隊,根本唔識咩叫入波!啲大字標題真係形容得好肉酸,「球員識得準確地射中龍門嗎?」「知唔知咩叫入波呢?」拉素擁躉睇完梗係心傷啦。不過我球壇包公都幫唔落拉素,17場聯賽入得嗰10球波,當中仲有8場交白卷,抵俾傳媒寸啦。聽講教練巴拿甸尼近期轉用3-4-3陣式,奈何都係入唔到波,最後搞到拉素要降班就樣衰咯。


日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們