高清881 高清903 am864 infomation
06.04.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:細哨又喪蒲斷正

22.12.2009 17:22

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

唉!唉!唉!呢3個字係我球壇包公,送畀AC米蘭嘅巴西球王朗拿甸奴嘅。有跟開意甲嘅球迷都知,「細哨」近期表現返晒嚟,又助攻又自己入波咁,偏偏爛玩爛蒲性格不改,家陣面臨俾教頭李安納度雪藏。

話說AC米蘭啱啱成立110周年,周圍搞慶祝活動都實屬正常,點知「細哨」偷偷地幫自己搞狂歡派對。巴西球星一向多夜生活,聽講「細哨」上個禮拜二、禮拜三同禮拜四,連續3晚落咗的士哥fever;早幾年呢位球王仲係天之驕子,冇人敢膽嘈你,之但係今時唔同往日,難得狀態好番啲,好心就戒咗啲惡習啦。

嗰邊AC教頭李安納度一收到風,差啲血管都爆埋;啱啱周日原本要對費倫天拿場波,「細哨」都俾李安納度剔除咗大軍名單,原因係:肌肉勞損喎。好彩我球壇包公一向八通天,呢單嘢擺明係李安納度雪藏「細哨」;唉,唔知「細哨」幾時先可以復出呢?

東尼減薪望圓世盃夢
效力德甲拜仁慕尼黑嘅意大利前鋒東尼,早排同教頭雲高爾嘈鑊勁嘅,家陣就算傷完出返嚟,正選位都唔使預佢。雲高爾講過:「我要啲隊員好守我規矩,但東尼成日以為自己係正選料,同我嘈咗好多次,呢啲球員咪冇大冇細囉!」換句話講,東尼喺拜仁都冇乜前途。早排先傳過韋斯咸想斟東尼,但佢17萬鎊周薪嚇親領隊蘇拿,結果傳會不成;最近車路士想搵人頂將出戰非洲盃而缺陣嘅杜奧巴個位,聽聞東尼係其中人選。呢位射手經已32歲,想入選世盃大軍嘅話,減一半人工都願意喎。

羅比堅尼仍然係熱刺隊長
熱刺喺本月12號0:1不敵狼隊之前,隊長羅比堅尼帶大隊瞞住哈利列納,走咗去愛爾蘭借打高爾夫球為名,實則成班落夜總會蒲。最後俾領隊哈利列納發現咗,聽講罰咗16位球員過百萬鎊。原本英國傳媒爆晒料,話帶頭搞事嘅羅比堅尼,個隊長臂章肯定會俾哈帥褫奪;哈,點知呢位主帥話唔會咁做,羅比仔仍然係球隊隊長喎。我球壇包公真係好唔明,羅比仔喺熱刺都冇正選打o架啦,哈帥仲要畀個隊長佢做,其實個用意喺邊呢?不如趁呢位愛爾蘭射手今次闖禍,直頭踢佢出隊好過啦!

「體盡世界」吹水blog已經推出,留言論盡今天體壇新聞、趣聞!
http://sport.blog.my903.com


 Tag   AC米蘭   意甲   朗拿甸奴   東尼   羅比堅尼   熱刺   拜仁慕尼黑   德甲  
日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們