高清881 高清903 am864 infomation
03.04.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:紅魔派對「隊冧」女

23.12.2009 17:38

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

紅魔聖誕派對大大鑊
英超球隊每年都例牌開聖誕派對,我球壇包公真係見怪不怪,之但係今年嘅聖誕節,班球員似乎玩得特別過份,特別怪誕!

早排熱刺以羅比堅尼為首共16位隊員,瞞住領隊哈利列納,話飛去都柏林打高爾夫球,原來其實飛去夜總會狂歡,結果加加埋埋被罰過百萬鎊。今次闖大禍嘅係曼聯,話說周一成班紅魔隊員,去咗里奧費迪南自己開嘅私人酒店開聖誕派對,聽講好多社會名人都有畀面出席;點知狂歡過後,突然有一名金毛女郎暈咗喺酒店門口,搞到要送去醫院搶救。好彩最後位金毛女郎冇事,只係飲大兩杯不醒人事o者,唔係英國傳媒有排做新聞。

曼聯領隊費格遜對呢單嘢就極為不滿,勒令叫隊員要遠離酒精。其實今次紅魔聖誕派對中,有大把小插曲發生;例如朗尼離開酒店嗰陣,竟然陪住佢嘅唔係老婆高蓮,而係女歌手加莉鍾絲,唔知返到屋企有冇俾老婆扭耳仔呢?仲有呀,意大利小將射手馬捷達,仲俾人影到喺派對狂煲雪茄。唉,總之呢個聖誕特別多怪事啦!

「金毛獅王」掛靴轉做教徒
一聽到「金毛獅王」呢個名,我諗上一代嘅球迷必定諗起哥倫比亞嘅華特拉馬;但係近代嘅球迷,一定會諗起曾經效力利物浦嘅葡萄牙守衛沙維亞。呢位以髮型奇特見稱嘅前葡萄牙國腳,日前喺阿聯酋一個體育記招上宣佈掛靴;正式退役之後,沙維亞會成為一位虔誠嘅伊斯蘭教徒,法號Faisal。以前沙維亞喺球場上面,個樣不嬲都凶神惡煞,私底下原來善心爆棚,佢嚟緊就會加盟一個幫助非洲嘅人道主義小組,專幫非洲一班貧苦大眾,認真偉大。

華素爾自喻「祭品」
前英格蘭國腳華素爾轉戰土耳其聯賽,諗住創一番事業,以為唔見老婆幾個月都值得,起初時確係頭威頭勢,離開機場時萬人空巷,成個世界級巨星咁款。之但係好景不常,球會安卡拉高拉負債嚴重,早前唔單止無為華素爾的酒店房俾錢,搞到呢位堂堂曾經亮相世界盃的29歲球星徬徨無助,最近只能在個人博客上吐苦水。

華素爾自喻為「山羊祭品」,事關佢親眼目睹球會在訓練場以一隻山羊作為祭品,令佢百感交集:「突然間,我覺得自己對動物產生咗憐憫之心,晚餐見到雞肉、羊肉都食唔落肚,佢哋覺得用山羊祭祀係平常事,我真係唔希望再見到喇!」華素爾透過博客暗示離隊心聲,希望其他球會同包公一樣聽得入耳,神啊,救救佢吧!


「體盡世界」吹水blog已經推出,留言論盡今天體壇新聞、趣聞!
http://sport.blog.my903.com


 Tag   曼聯   費格遜   英超   沙維亞   華素爾  
日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們