高清881 高清903 am864 infomation
03.06.2020
  1. 聲音專欄
  2. 節目主持
  3. 節目表
  4. 排行榜
  5. 馬路的事
  6. 九〇三格
  7. Apps
體育 | 體育新聞

球壇包公:嫖妓醜聞攞名帥嚟玩

25.12.2009 18:40

【商台互動體育組】球壇包公:人善人欺天不欺,世間還有包青天,我球壇包公會負起替天行道的責任,為球壇的重要大事以至雞毛小事主持公道,不偏不倚,上至國際足協,下至球場草皮都難逃法眼,球迷放心:

真正嫖妓嗰個係……?
呢期既英超熱話,除咗曉士突然之間畀曼城請食「豉椒炒魷」,文仙尼接班搞到比拿美班球員玩對抗之外,仲有就係最近呢兩日爆出既「英超領隊嫖妓事件」嘞!今次爆料既英國《太陽報》冇直接咁指名道姓係邊個,搞到唔少英超著名領隊好似費格遜、雲格同埋賓尼迪斯都畀班網友攞佢哋嚟玩,因應佢哋既情況套入「嫖妓事件」,好似話賓帥為咗減壓,所以去做泰式按摩,兼享「特別服務」咁話喎。

不過心水清既都知道,呢3位英超名帥係「嫖妓事件」主角機會真係唔大,講真以佢哋既名氣,點都唔會咁樣大搖大擺啩,所以話佢哋嫖妓都係玩吓啫,咁究竟邊個先係「雞蟲領隊」呢?咁就真係要睇吓之後英國嗰邊仲有咩料爆,同埋有咩蛛絲馬跡畀大家估吓嘞!

泰利想教車仔
呢排因為收錢畀球迷入場睇操練既車路士隊長泰利畀人套上咗個「守財奴」既惡名,周薪都已經有成10幾萬鎊,都仲要貪嗰少少每個月1萬鎊既「入場費」,咁都不突止,佢仲諗住用英格蘭國家隊隊長既名號向贊助商挖得就挖,搞到隨時可能畀管教鬼咁嚴既卡比路褫奪隊長臂章,隨時得不償失。講句公道話,球員職業生涯短暫,搵得就搵都係正常事,所以泰利話佢想掛靴之後做車仔領隊,我包公就講得佢聰明咗,咁有油王阿巴莫域治「射住」,到時想抽幾多油水都名正言順啦。

列文無端端畀球迷告搶劫
史特加既40歲門將列文呢排認真麻煩多多,之前匿埋喺廣告板後面疑似人有三急,眾目睽睽兼且有唔知幾多枝鏡對住佢既情況下小解,史特加仲可能因為咗樣而同佢解約。門將份工作危危乎,呢排佢仲惹埋官非喎,話說月中嗰陣史特加作客緬恩斯既時候,佢畀敵對球迷挑釁,忍唔住一手抹走咗嗰個球迷面上既眼鏡,家陣個球迷又玩嘢,報警話列文搶佢封睇鏡,聽講列文就「搶嘢」道咗歉,不過條氣就好唔順咁話:「嗰陣時咁做先可以令佢收聲。」

「體盡世界」吹水blog已經推出,留言論盡今天體壇新聞、趣聞!
http://sport.blog.my903.com


 Tag   費格遜   雲格   賓尼迪斯   泰利   卡比路   列文  
日期
由:
到:
類別:
關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們