【叱咤樂壇 Brand New Live 生力軍音樂會】5大HIGH爆位！

由叱咤903主辦、Katch優惠平台呈獻《叱咤樂壇Brand New Live 生力軍音樂會》KKday探索新力量喺一片歡呼聲中圓滿結束，high爆全場！終於等到呢班新生代歌手單位：193、ANSONBEAN、before the night ends、Fatboy、mansonvibes、MC $oHo & KidNey、MC張天賦、力臻、李妍、姚焯菲、張蔓姿、惡夢扭蛋及薛晉寧，破天荒同台演出，合力喺呢個多元宇宙嘅舞台爆發星火，燃點新力量！即睇5大HIGH爆位～

============================

1. 揭幕即HIGH爆！型男激情跳唱

打頭陣最緊要有氣勢，開場率先嚟一系列跳唱歌轟炸舞台！第一首超硬朗歌曲《虎道門》已經high爆全場，喺呢個元宇宙世界，唔止MC $oHo & KidNey同ANSONBEAN 嘅hip hop造型十級型爆，連比較少郁動嘅MC張天賦都加入呢個跳唱行列，全場一齊 go with their flow！Fatboy 嘅《Lady Killa》繼續焫著全場，秒殺一班 ladies！之後ANSONBEAN跳《RISE》更爆晒汗，一身肌肉睇到大家血脈沸騰！

2. 「老婆sss」HIGH爆！男神派福利

193同173嘅薛晉寧呢個「183男神」組合，一入場就搞笑互窒對方，仲話要除衫裸體，雖然只係講，但已經𠱁到一班老婆sss開心尖叫！兩人crossover《睡到三點》同《Hand Solo》，193好識做大派心心，喺唱《再次Puppy Love》時更甜蜜攻陷一眾老婆！派福利嘅唔止33，仲有另一型男力臻，佢同李妍、惡夢扭蛋合唱《秘密有害_dyk?》中途，被惡夢扭蛋Hugo除咗件衫，露出一身fit爆肌肉！唔知大家嘅focus係唔係去晒力臻排「朱古力」度呢？

3. HIGH爆火花！Medley溫柔互動

一班風格咁多元嘅歌手crossover 會有乜火花？由張蔓姿、mansonvibes陪大家進入慵懶時光，用《今天我不想做嘢》帶大家喘息一下！之後，before the night ends 、張蔓姿同mansonvibes投入為大家伴舞/伴奏，全程眼神柔情對望，戲劇感爆燈！仲有MC $oHo & KidNey搞怪以牧童笛吹出《香港早晨》前奏，再夾埋ANSONBEAN 、before the night ends、Fatboy、薛晉寧成班bro一齊 jam柔情歌，零舍warm！一連串crossover展現多元曲風，令觀眾們耳朵懷孕！

4. 甜度HIGH爆！情歌冧爆放送

MC獻唱《浮誇》高音層層遞進，超水準發揮令fans瘋狂尖叫！一輪狂野演出後，MC搖身一變成為甜絲絲男孩，同Chantel合唱《Honest》，二人坐喺長凳唱《老派約會之必要》一幕，十足曖昧中嘅情侶咁冧豬！MC坐近Chantel時引嚟現場陣陣尖叫，情深款款對望偷笑，就好似帶大家談咗一場戀愛咁sweet～

5. HIGH爆驚喜謝幕！Kayan9896 現身《係咁先啦》

以為就咁就完，臨走前都整個高潮畀大家！一響起bye bye界校歌《係咁先啦》嘅前奏，全場已經傳嚟陣陣尖叫聲！所有歌手一齊出嚟大合唱謝幕，全場陷入瘋狂狀態，分貝爆錶！中段更有女神Kayan9896驚喜現身，令一眾男觀眾馬上醒神，加上各位新星嘅感言，有笑有淚，為叱咤樂壇 Brand New Live音樂會完美落幕！

初生星體合奏閃亮全場，一班生力軍竭盡所能爆發小宇宙！好唔捨得一場咁精彩嘅演出咁快就完咗，期待各位新星繼續為香港樂壇注入更澎湃嘅新力量！