由叱咤903主辦、Katch 優惠平台呈獻拉闊音樂會江𤒹生 x 陳蕾 x 陳卓賢喺今晚隆重舉行！三位歌手全情投入，展現「紅、綠、藍」三原色攝人魅力，折射出非一般光芒！即睇「光之折射」5大回味不盡精彩位～

熱血不盡！

Wow～～～喺一片生粉、Hellosss、仙子們嘅「打雷式」歡呼之下，AK、陳蕾同Ian以《正式開始》、《特登》及《娛樂人生》揭開音樂會序幕。點解全場又起一陣尖叫？原來三人合唱AK嘅熱血勁歌《虎道門》，重新編曲帶嚟完全不一樣嘅感覺！走過呢道虎道門，歌手醒神演出！

台上三色燈光幻變，三人隨即一齊跳唱《Run Away》，平時比較少跳舞演出嘅陳蕾同Ian都應付自如，果然無嘢難到「豹哥」同「男子漢」！熱血不盡嘅表演，光速將現場氣氛推往高峰！

熟悉嘅澎湃旋律，喺AK嘅振臂下奏起，原來係熱血歌《信之卷》，台下生粉紛紛舉起手上燈牌和應，不枉台上AK跳到爆晒汗！

陳蕾以一身性感嘅綠色造型衝擊觀眾眼球，變身「豹哥」用撕裂唱腔唱出《下流社會》，結尾一聲「豹哮」，不單將獨特唱功展露無遺，同時燃點全場氣氛！

心心眼不盡！

一輪熱血演出後，窩心嘅AK特登製造飲水抹汗位，引嚟一班生粉心心眼，再嚟溫柔自彈自唱《三個字》深情剖白內心世界！陳蕾再同AK 孖住演繹《出走》及《相信一切是最好的安排》，輕柔動人嘅旋律觸動fans～

緊接有Ian帶住大家潛入海底深處，柔情演繹《鯨落》同《再見寧靜海》，全場亮起一片藍色燈海超有氣氛～Ian更邀請全場大合唱，一齊感受大海嘅神秘魅力！作為「柔情擔當」，Ian更以柔和聲線唱出《另一個諾貝爾》，不過要數到最甜蜜時刻，一定係新歌《抱抱無尾熊》時間，音樂響起即冧爆Hellosss，Ian仲話想聽Hellosss唱，加上熒幕出現兩隻可愛樹熊，台上台下齊齊甜笑～

Ianson亦終於合體喇！Ian唱《金星女孩》期間AK驚喜加入，仲深情對唱《留一天與你喘息》，呢個組合糖份極高，當然全場變晒心心眼！

驚喜不盡！

代表紅色、象徵活力嘅AK率先獨挑舞台！AK身披紅色戰衣，喺台上首度跳唱新作《Keep Rollin’》，呢個第一次，送畀現場生粉一個大大驚喜！

陳蕾曾經講過想同AK合唱日文歌，今晚圓夢喇！兩人置身日本風背景前合唱大hit日文歌《どうして》，喺努力練習下果然有板有眼勁有feel，識日文嘅fans應該聽得好投入！

三位歌手聚首舞台，以Acoustic方式合唱出大家嘅作品，充滿新鮮感！各有特色嘅聲線互相交纏，chill住將《DWBF》、《不想回家》及《世界與你無關》三首歌，以嶄新曲風再次俘虜fans！呢part驚喜演出，相信只此一次，入場或睇直播嘅fans真幸福～～

默契不盡！

Ian夥拍陳蕾首次合作已經盡顯默契，一齊以結他彈唱《白晝之月》，兩位結他高手拎住自己代表顏色嘅結他演出，零違和夾到不得了！

AK隨後霸氣登場，三人合力彈唱《黑之呼吸》，雖然要一邊彈一邊唱，但佢哋合作就好似呼吸咁自然流暢，滲出陣陣完美組合吸引力！Ian 夾住AK再為陳蕾伴奏《妖治時代》，三原色集合成為閃耀白光，rock 爆全場！

之後，Ian化身鋼琴王子，為陳蕾伴奏《窮人的薔薇》，而陳蕾則為Ian結他伴奏《地球上的最後一朵花》回禮，默契度爆錶！合唱英文歌《Volcano》時，Ian再為陳蕾彈奏結他，不同曲風都可以輕鬆駕馭，讚！

意猶不盡！

「三之不盡」～呢場騷一定令大家「意猶不盡」！音樂會尾段，隨住台下fans不斷「召喚」自己偶像，三位歌手身穿型爆黑西裝再次登場！配上熱舞唱出MIRROR英文團歌《RUMOURS》，將氣氛再次炒向最高點！

隨後三人輪流發表演出拉闊感受，AK大爆陳蕾「自動申請」跳舞，Ian 、AK仲話要為咗畀陳蕾加入MIRROR而踢對方出團，台下嘅MIRROR隊長Lokman慘成磨心，場面搞笑！三人互讚互窒，豹哥大讚AK係將勤補拙嘅「地才」、Ian就係乞人憎嘅天才，可見三人搞笑功力拍得住歌唱實力！

陳蕾再solo 跳唱新作《伸縮自如的愛》，再次自證跳舞成就解鎖，而AK則為粉絲演繹《Blue Monkey》，好似隻馬騮喺台上跳跳紮，果然係三原色入面嘅「活力擔當」！

演出愈接近尾聲，舞台上下能量愈勁！三原色再度合體，跳唱《REBOUND》，再掀高潮，一齊抵死演繹「韓式呼吸」，臨完場都不忘引大家開心！

最後更三為一體合唱陳蕾嘅勵志歌曲《熒光》，將正能量光束傳遞給每一位fans，並為呢場拉闊音樂會帶嚟意猶未盡嘅結尾！再祝大家母親節快樂～