商業電台踏入六十四年，繼續同聽眾攜手同行，只要有聽眾想收聽我哋嘅節目，無論何時何地，商業電台都會透過大氣電波陪伴著每一位聽眾，好似聽眾嘅空氣一樣。闊別三年嘅台慶晚宴，今年台前幕後嘅員工終於可以聚首一堂，更同步以網上形式同大家一齊見證商台一年一度嘅重要時刻！

商台員工聚首一堂華麗盛裝共進晚宴
一年一度，難得一晚，個個都盛裝到場，大家仲準備咗主題造型，881 DJ大玩迷人粉紅Barbie造型，903 DJ就以Bling Bling造型閃住出席，881嘅葉宇澄同903嘅阿酸率先帶大家遊走全場，欣賞衣香鬢影、華麗盛裝嘅現場實況。

驚喜環節全場慶祝金剛叔90歲大壽
今年除咗係經典廣播劇《十八樓C座》55週年，更係聲演周老闆嘅金剛叔90歲大壽！喺晚宴上特別安排同金剛叔驚喜慶祝，由商業電台主席何驥先生、商業電台董事及行政總裁陳靜嫻小姐親自向金剛叔送贈生日禮物，喺全場大合唱祝壽歌下進行切壽桃儀式，為金剛叔帶來難忘回憶！

感激員工付出頒發長期服務獎
為感謝一眾服務商業電台多年嘅功臣喺過去六十四年來為公司嘅付出，喺台慶晚宴上，商業電台主席何驥先生、董事及行政總裁陳靜嫻小姐、首席智囊陳志雲先生向服務多年嘅台前幕後同事頒發長期服務獎，以表揚佢哋多年嘅付出同貢獻。當中喺《十八樓C座》聲演祥嫂嘅朱雪梅更服務咗商台60年，經已超過半個世紀！

881 VS 903 DJ激玩「商台三連環」
每年台慶嘅「商台三連環」都係大家最期待嘅環節，今年亦唔例外。881隊同903隊各自派出DJ代表大戰三回合，參與嘅DJ全情投入遊戲，戰況激烈，實在鬥得難分難解，究竟誰勝誰負？即刻去片！

商業電台六十四週年台慶晚宴隨住笑聲、掌聲、歡呼聲中圓滿結束。商台會繼續同大家攜手同行，繼續成為大家嘅空氣，無論何時何地，一齊同呼同吸。