高清881 高清903 am864 infomation
22.10.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps
 
 
 
 
港區人大不如聯誼會? 
06.03.2009        
     

兩會嘅戲肉──全國人大會議隨溫家寶講咗兩個鐘嘅政府工作報告終於開幕咯。三十六位港區人大代表係採訪嘅焦點:范徐麗泰、羅范椒芬、陳智思、葉國謙,個個都熟口熟面,不過,其他嘅港區人大,例如袁武、雷添良、費斐,莫講話一般市民唔識,就算係採訪人大新聞嘅記者,都未必清楚佢地邊個打邊個。
 
咁呢三十六位港區人大又係點選出黎呢?

香港同澳門嘅人大選舉辦法同全國嘅制度有少少唔同, 假設我想參選港區人大,第一件事就要符合最低參選資格,即係年滿十八歲,亦都係香港嘅中國公民,即係喺中國地方出世(包括港澳地區),有中國血統嘅香港居民。然之後,仲要取得十個人大選舉會議嘅提名。
 
人大選舉會議是甚麼?選舉會議就包括特首、上一屆嘅港區人大、當屆嘅政協、特首選舉委員會成員,加埋若干個中方認可嘅社會人士,以上一屆為例,總數有一千二百三十四人。我除咗要向呢千幾位選舉會議成員攞提名之外,投票選人大代表嘅時候,仲要取得超過一半嘅支持,先至可以正式成為人大代表。
 
驟耳聽落,呢個選舉方法複雜,嗰一千二百幾位選舉會議成員,大部分都係經由北京政府點頭委任,結果,咁樣北京就可以間接控制人大的參選資格,與及誰可以當選。
 
香港人大選舉真係一個名附其實嘅小圈子選舉,由參選以至投票,完全可以由嗰個中方信得過嘅選舉會議成員操控。內地唔少城鄉嘅地方人大,已經採用一人一票嘅方式進行直接選舉。以香港一河之隔嘅深圳為例,佢地03年嘅地區人大選舉,仲採用咗自薦嘅方式,參選人士可以自己搵人提名參選。而港區人大代表仍然用依一種小圈子嘅選舉方式,確實相當保守。
 
港區人大嘅選舉方法,固然控制咗邊個可以參選同當選,有志之士就算當選,亦未必可以大展掌腳。前港區人大代表李鵬飛,佢有十年經驗,就用「單打獨鬥」形容喺人大嘅工作:
 
李鵬飛強調,佢就算真係好有心去為香港人服務,不過中央政府根本唔會重視港區人大工作。好似話,佢當年想協助香港人處理內地問題,寄去內地政府部門嘅信件,只有百分之七係有回覆。至於喺香港設立辦事處呢個提議,更畀全國人大副秘書長喬曉陽一口拒絕,理由係中央唔想港區人大介入香港內部事務。而城市大學政治學講座教授鄭宇碩亦都話,港區人大唔會有咩作為……
 
鄭宇碩認為,中央為咗唔想削弱立法會嘅權力,所以唔想港區大人代表處理本地事務,所以香港嘅大人代表去到開會嘅時候,只能夠為全國性問題出謀獻策,完全發揮唔到港區人大代表為香港人服務嘅應有功能。
 
港區人大,如果連辦事處都唔可以成立,連香港人嘅問題都唔可以處理,我地仲可以寄望佢地可以為香港人做啲咩咯。不過,呢幾日人大會議,大家仍然要睇實啲佢地開會嘅情況,因為好多位港區大人,佢地嘅盧山真面目,係呢幾日你先見得到咋!
 
(本聲音專欄只反映主持人及個別參與人士的個人意見。)
 
 
中國法國床頭打交床尾和
03.04.2009
免費睇動物買少見少
02.04.2009
簡約生活不簡單
01.04.2009
鬼網要小心
31.03.2009
粗口咪亂講
30.03.2009
香港駐台辦事處逼在眉睫
27.03.2009
已經有0位網友作出回應

 
姓名: 雷霆一擊小組
真名/別名: 雷霆一擊小組
生日:
星座:
 

DJ:
欄目:
     



關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們