高清881 高清903 am864 infomation
18.10.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps
 
 
 
 
港產電動車土生不能土長? 
16.03.2009        
     

曾俊華喺最新嘅財政預算裏面,提出咗要普及電動車輛,話係為咗支持環保。

「我將會領導一個督導委員會,研究喺香港更加廣泛使用電動車輛,為『千里之行』邁出重要嘅一步。」

曾司長喺預算裏面講嘅「千里之行」,又好似遲咗啲喔。其實舊年,香港本地研製嘅電動車——myCar,已經揚威咗歐洲車展,不過竟然就仲未可以喺香港落地行駛,原因係佢嘅車速最高只係得64公里,而香港仲未有呢一種規格介乎電單車同埋私家車之間嘅汽車牌照,所以佢先至遲遲未能出街。

不過,呢類比最高時速唔夠70公里嘅小型車輛牌照,其實喺外國已經推出咗好多年,而美國就喺1998 年嘅時候推出咗一種特別嘅車牌類別,叫做 「社區電動車」NEV嘅牌照,而喺歐洲呢類車牌就叫L7E同埋L6E嘅小型車,亦都喺當地流行咗好耐喇,甚至以色列都喺舊年開始,喺市區嘅商場安裝咗電動車充電嘅裝置,畀呢一類小型車使用,以色列當局仲已經定下咗時間表話到明要喺2011年之前全國嘅配套就會搞掂哂,到時以色列全國都可以行駛電動車。

香港本地研發嘅電動車myCar有兩個座位,最高時速可以去到64公里,而外形醒目兼且有活力,喺英國嘅售價都只係大約九萬蚊港幣。雖然香港唔畀行,但係其實呢架由理工大學研究嘅電動車myCar已經符合咗歐洲嘅安全標準,仲喺舊年倫敦車展入面打低其他國家研發嘅電動車,贏得大獎。依家製造商己經接到來自英國嘅訂單,預計今年仲會為歐洲生產400架添,製造商EU Auto嘅行政總裁鍾倩玲就話,其實佢哋都想拓展本地市場。

架車喺歐洲咁受歡迎,但係偏偏就因為香港未有呢類規格嘅牌照,令到呢架電動車唔能夠喺香港嘅道路行駛。對於呢方面,香港汽車會會長雲維熹就話,香港嘅道路法例對車輛嘅要求一向都比歐洲標準嚴格,佢仲話,標準定得太高其實都有啲不切實際。

香港人多,而且馬路窄,其實好適合揸呢一類小型車,唔知係咪因為香港政府嫌立法麻煩,到依家都仲未有聲氣話會批准呢啲小型電動車嘅牌照,比世界其他地方,顯得有啲落後。其實喺歐洲,佢哋規定嘅呢種小型車唔可以上高速公路,而喺加拿大嘅卑斯省就容許時速唔超過60公里嘅電動車喺馬路上面行駛,佢哋嘅做法就係規定小型車要掛上「慢車」嘅標示,同埋喺高速公路行駛嘅時候要打死火燈,所以香港當局如果因為小型車行駛速度唔夠快,阻塞交通而唔發牌嘅話,根本就站唔住腳。

理工大學機電工程學系教授鄭家偉就話,其實香港政府係可以先批准呢一類小型電動車喺一啲嘅地區行駛,之後先至普及去到一般嘅街道。

鄭教授亦都話,依家電動車嘅技術已經發展得好成熟,唔單止唔會排放廢氣,馬力絕對唔會比其他汽車細,燃料費更加可以平到一毫一公里,可以講係一般汽油車嘅十分之一。曾司長成日叫人畀意見佢,嗱,意見就喺度喇,收到未啊?

(本聲音專欄只反映主持人及個別參與人士嘅個人意見。)

 
 
中國法國床頭打交床尾和
03.04.2009
免費睇動物買少見少
02.04.2009
簡約生活不簡單
01.04.2009
鬼網要小心
31.03.2009
粗口咪亂講
30.03.2009
香港駐台辦事處逼在眉睫
27.03.2009
香港設計環保車介紹
香港設計 (貿發網 hktdc.com)
已經有2位網友作出回應

very good !!希望政府快D立法,比它地上路!

16.03.2009 13:02 post by 可惜係水瓶座
 
Shame for HK Gov

16.03.2009 12:46 post by sam
 
 
姓名: 雷霆一擊小組
真名/別名: 雷霆一擊小組
生日:
星座:
 

DJ:
欄目:
     



關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們