高清881 高清903 am864 infomation
21.10.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps
 
 
 
 
東海南海島嶼爭奪戰 
18.03.2009        
     

呢個月美國探測船「無暇號」,喺南中國海被中國船隻包圍之後,美國就決定話要派出驅逐艦去護航,繼續用探測船去海南島對開嘅海域,探測中國潛艇嘅活動,令區內局勢進一步升溫。不過火上加油嘅就係,菲律賓政府已經通過咗法案,將區內嘅黃岩島同南沙群島劃為菲律賓領土。連同東海同南海,原來中國已經同七個國家有領海爭議,呢啲地方隨時都有可能會引起軍事衝突。

呢次中國同菲律賓有爭議嘅南沙群島,一共有1,700幾個島嶼,宜家聲稱有主權嘅島嶼裏面,中國同台灣控制咗十個,而越南、菲律賓、馬來西亞、印尼同汶萊就控制咗45個。菲律賓呢次將南沙群島劃為領土,令南沙群島主權嘅爭議升級。

南沙係距離中國大陸大概1,500公里,接近汶萊同菲律賓,雖然呢啲島仔離中國咁遠,不過因為位置特殊,中國嘅進口石油,有七成要經呢條路線,所以戰略價值非常之高;而南海嘅石油儲存量更加驚人,足夠中國使用100年,更加令到南沙群島成為各國必爭之地。近年中國喺周邊海域都有唔同嘅糾紛,南沙群島之外,同日本就有釣魚台、南韓就有蘇岩島,而越南就係西沙群島。中國對呢啲島嶼咁緊張,係因為除咗資源同主權之爭外,亦因為中國嘅近海海域,例如南海、東海、黃海,都俾呢啲島嶼包圍,如果中國要成為大國嘅話,就要走向海洋,而呢啲島嶼就好可能成為絆腳石。

菲律賓喺呢個時候,將南沙群島劃入自己領土,其實為咗趕喺今年5月13號之前,向聯合國提交劃界案,以符合《聯合國海洋法公約》嘅最後限期要求。呢份公約主要為咗解決各國嘅海域資源、污染同領土糾紛。而各國之間嘅領海糾紛,多數都係因為大家對領海嘅解釋有唔同,中文大學亞太研究所研究員鄭海麟話,呢次菲律賓同中國嘅南沙群島糾紛,就係源於呢個問題。

菲律賓引用嘅大陸架概念,即係話海岸對出嘅海床,如果唔深過200公呎,就屬於佢嘅領海。而南沙群島正正係位於菲律賓嘅大陸架上面,所以菲律賓視佢為自己領土。至於中國引用嘅原始權利,即係話最先開發嘅國家,就有呢個土地嘅主權。中國認為自己喺南沙群島已經有好多年發展歷史,所以南沙係屬於中國。

既然連最基本嘅概念都有唔同嘅解釋,難怪呢啲領土糾紛會沒完沒了。以南沙為例,上世紀70年代,中國同菲律賓、越南、馬來西亞、印尼四國,相繼爭奪南沙群島嘅控制權,直至90年代,中國先提出共同開發嘅主張,呢啲咁嘅糾紛先至冷卻咗落嚟。不過大家宜家都有數以千計嘅兵力駐守喺區裏面嘅小島上,萬一大家有咩爭執嘅話,分分鐘會擦槍走火,發展成為軍事衝突。鄭海麟話,中國對呢個問題,索性唔參與聯合國嘅仲裁,一於我行我素。

作為中國人,我哋梗係希望自己嘅國土唔會俾人侵佔。其實,各國爭奪南沙只係為咗經濟利益啫,共同開發,和氣生財,係咪一個最好嘅選擇呢?

(本聲音專欄只反映主持人及個別參與人士的個人意見。)

 
 
中國法國床頭打交床尾和
03.04.2009
免費睇動物買少見少
02.04.2009
簡約生活不簡單
01.04.2009
鬼網要小心
31.03.2009
粗口咪亂講
30.03.2009
香港駐台辦事處逼在眉睫
27.03.2009
消息指美軍派神盾級驅逐艦…
12.03.2009
中國擁有南沙群島彈丸礁主…
07.03.2009
已經有0位網友作出回應

 
姓名: 雷霆一擊小組
真名/別名: 雷霆一擊小組
生日:
星座:
 

DJ:
欄目:
     



關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們