高清881 高清903 am864 infomation
12.11.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps
 
 
 
 
香港駐台辦事處逼在眉睫 
27.03.2009        
     

民政事務局局長曾德成,呢個禮拜六去台灣拜佛。他一方面話自己是因為局長嘅身分先至俾人邀請啫,一陣又話呢個係私人名義嘅訪問嚟嘅,但同時間又俾人揭發係要用公帑。如果局長真係諗住私底下去台灣拜佛嘅話,咁就唔好諗住打好香港同台灣嘅關係喇。如果係去台灣搞好官方關係嘅,咁就唔該大方啲,宜家嘅行程就正一係名不正言不順,有啲鬼鼠同埋藏頭露尾喎。
 
其實回歸之後,港府同台灣嘅關係就好似曾德成呢次訪問嘅身分一樣都係曖曖昧昧,咁多年嚟都無既定嘅方向,只係跟住大陸嘅既定立場去走。喺陳水扁擔任台灣總統期間,唔少台灣官員都係俾特區政府冷淡對待,甚至係拒絕入境嘅。拒絕入境嘅名單包括:04年同陳水扁關係密切嘅商人林文淵、05年就有喺香港出生,但當時係台北市市長嘅馬英九、07年就有台灣陸委會委員張志宇。
 
香港對台灣嘅態度要跟住北京,可以講係無可厚非嘅。不過,台港關係唔應該因為政治氣氛而有所改變嘅。好似話,香港人去台灣旅遊,每年就有超過1500萬人次喇,而台灣人最常去旅遊嘅城市亦都係香港,比日本仲多。而且,香港同台灣嘅貿易關係一直都係咁密切嘅,台灣係香港第四大貿易夥伴,更加係香港第六大嘅出口市場添,兩地嘅貿易額每年係有成330億美元。
 
香港宜家喺台灣有三個非官方嘅辦事處,分別就係由港商成立嘅「港台商貿合作委員會」、貿發局嘅台北辦事處、仲有旅發局嘅台灣代辦處。相反,政制及內地事務局喺廣州、上海同埋成都呢三個國內城市都設有辦事處咖喇,並且由D2級以上嘅官員擔任辦事處主任添。至於話海外城市,遠至紐約同埋倫敦、近至東京同埋新加坡,亦都有由商務及經濟發展局成立嘅海外辦事處,負責嘅官員最高仲去到D6級添。
 
台灣既然同香港有咁密切嘅關係,係咪應該喺台灣成立一個類似嘅官方辦事處呢?就算話香港奉行一個中國政策喇,咁台灣嘅官方辦事處,至少都有上海嘅級數掛。
 
政制及內地事務局局長林瑞麟就話,嚟梗呢年會增加幾百萬嘅撥款,去到加強貿發局喺台北嘅工作。不過,貿發局喺台北辦事處只不過係非官方嘅貿易單位嚟嘅啫,作用非常之單一。就著呢一方面,熟悉大陸同埋香港關係嘅台灣淡江大學副教授張五岳就話呢一類嘅非官方辦事處,根本無助於港台交流……
 
張五岳強調,香港同台灣兩地政府,應該分別喺對方成立官方辦事處,咁先至可以處理貿易以外嘅問題。佢話最簡單嘅就好似香港人去台灣旅行之後發生意外喇,喺而家嘅制度之下,可以話係求助無門。
 
而城市大學專業進修學院高級講師宋立功就話,宜家香港同台灣嘅官方交流,仲未好成熟,要成立官方辦事處似乎有啲難度喎……
 
香港人崇拜台灣歌星、睇台灣嘅電影、中意去台灣旅行,但係特區政府竟然因為政治原因而疏遠同台灣嘅官方關係,喺台灣連一個似樣嘅官方辦事處都無。咁呢一次曾德成台灣之行,希望係邁向兩地關係正常化嘅第一步。

(本聲音專欄只反映主持人及個別參與人士的個人意見。)

 
 
中國法國床頭打交床尾和
03.04.2009
免費睇動物買少見少
02.04.2009
簡約生活不簡單
01.04.2009
鬼網要小心
31.03.2009
粗口咪亂講
30.03.2009
香港駐台辦事處逼在眉睫
27.03.2009
已經有0位網友作出回應

 
姓名: 雷霆一擊小組
真名/別名: 雷霆一擊小組
生日:
星座:
 

DJ:
欄目:
     



關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們