高清881 高清903 am864 infomation
20.09.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps
 
 
 
 
簡約生活不簡單 
01.04.2009        
     

三月份嘅《美國新聞周刊》刊登一篇文章叫做《節約家庭守則》(The Frugal Family Guide),內容講作者屋企嘅簡約生活,於美國引來好大迴響,好似話佢父母一個老鼠夾用足五十年都唔揼,屋企咁多年都無買乾衣機,又唔會安裝有線視收費頻道。不過文章作者強調,佢父母只係生活簡約,並唔係孤寒。佢地會請屋企一家七口去迪士尼玩足一個禮拜,朋友生日仲會送古董做禮物添。
 
簡約生活呢個概念,其實喺1920年代已經有經濟學家提倡,到1981年有位美國作家出版一本書叫《自求簡樸》(voluntary simplicity)之後,呢個思想受歐美嘅知識分子注意。1995年開始,英國喺每年嘅四月,舉辦一個叫「全國減速生活周」嘅活動,認為「人如果使錢越多,就越會嘥多啲時間去搵錢」,所以主張要減少消費,促進社會可持續發展。
 
而喺中國內地,其實已經掀起一股節約熱潮。舊年六月開始,內地有網民發起一個叫「百元周」嘅運動,要求參加者由星期一至星期五,五個工作日裏面,只係消費一百蚊人民幣。全國網民好多都響應呢項活動,並將自己嘅消費記錄放上網,大家鬥用錢用得少。
 
六七十年代嘅香港人,佢地嘅消費模式其實都好簡約。年長一輩嘅朋友,或者仲會記我嗰時嘅父母,買嘢講求「襟」用,好似話一部雪櫃用足十幾二十年,一個熨斗由細妹小學一年級用到佢中學畢業為止;至於小朋友嘅校服,阿哥著到唔啱著就送畀細佬,細佬唔啱著再送畀隔離屋小朋友。呢啲消費方法,喺而家有啲人一部手機用三個月,一條牛仔褲著一季嘅年代,就好似有啲匪疑所思。
 
兩年前,我潘小濤係《打書釘》節目中訪問天文台台主林超英,佢原來就係呢啲講求簡約生活嘅人。佢嘅西裝只係得兩套,西褲得兩條,皮鞋就有一對半。點為之一對半皮鞋呢?原來佢出街嘅皮鞋,一對就有穿窿,一對就完好無缺。穿咗窿嗰對皮鞋佢都照著出街,就係等好天嘅時候著嘞,落雨時就穿沒穿窿嘅一對。
 
林超英係高級知識份子,或者好多人覺得佢太過遙不可及,佢啲生活方式想學都學唔黎。不過,而家香港唔少年輕人都已經追求呢一類簡約生活。Gigi今年廿四歲,佢同普遍後生女一樣都鍾意上網、一樣鍾意貪靚打扮,唯一唔同嘅,係佢鍾意放假嘅時候留喺屋企……
 
Gigi會自己整番梘,佢話用四五十元買材料,就夠全家人用足半年。佢亦都會喺屋企種蕃茄用黎煮飯。佢話呢啲日常生活嘅小節,根本唔會嘥佢咩時間,但係就可以令佢同佢屋企人都買少好多野。
 
Gigi除咗DIY佢嘅生活所需要,其實佢都鍾意買嘢。不過佢買嘢嘅態度,就真係似足六七十年代嘅香港人買雪櫃嘅態度……
 
四月十八號英國開始佢地今年嘅「減速生活周」活動,佢地今年其中一個活動主題就係「減少搵錢嘅壓力」。即係話減少消費,自然減少搵錢嘅需要。其實喺經濟不景之下,唔少人身家唔見咗一大橛,呢個時候,大家應該好好思考一下,與其嘥時間不斷搵錢,又不斷洗,不如用多啲時間去提升自己嘅生活質素,同家人朋友過一啲充實嘅生活。

(本聲音專欄只反映主持人及個別參與人士的個人意見。)

 
 
中國法國床頭打交床尾和
03.04.2009
免費睇動物買少見少
02.04.2009
簡約生活不簡單
01.04.2009
鬼網要小心
31.03.2009
粗口咪亂講
30.03.2009
香港駐台辦事處逼在眉睫
27.03.2009
已經有0位網友作出回應

 
姓名: 雷霆一擊小組
真名/別名: 雷霆一擊小組
生日:
星座:
 

DJ:
欄目:
     



關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們