高清881 高清903 am864 infomation
10.12.2019
  1. 新聲上載
  2. 聲音專欄
  3. 節目主持
  4. 節目表
  5. 網上直播
  6. 節目重溫
  7. Apps
 
 
 
 
中國航空母艦好打得? 
01.01.2009        
     

日本《朝日新聞》報道,話中國喺半年前已經喺上海市郊,興建好一個全球最大型嘅造船基地,打算喺嗰度建造航空母艦。而喺上星期,中國國防部已經明確表示,中國國防部會「認真研究考慮」建造航空母艦嘅問題,以發展遠洋海軍。
 
事實上,中國建造航空母艦嘅消息,備受國際關注。喺過去呢二十年,中國已經從澳洲、俄羅斯和烏克蘭購買咗4艘退役航空母艦,其中兩艘喺深圳同天津,被改造成為旅遊設施,另一艘澳洲嘅墨爾本號,就一早已經拆除。專家估計,中國軍方已經將呢啲航空母艦進行詳細嘅分析研究,為中國建造航母作準備。
 
至於嗰艘黎自烏克蘭嘅航母「施瑯號」,係一艘6.75萬噸級嘅航母。不過呢隻船喺八十年代,由蘇聯政府建造,結果因為蘇共解體,隻船造咗七成就要停工。到1998年,一家由中國控制嘅澳門公司,用二千萬美金買咗呢艘船,話會停喺澳門作旅遊之用。不過,由於西方政府多番阻撓,一路都去唔到大陸。直至而家,呢隻船雖然有人估計佢停咗喺大連海軍基地,但佢嘅行踪仍然不明。
 
呢次朝日新聞就係話會將呢隻只係起好七成嘅「施瑯號」改裝,成為一艘可以作戰嘅戰艦,並估計中國第一航空母艦會喺2011年下水。咁中國有咗航母艦之後,又會唔會對鄰國產生威脅呢?
 
對中國軍事好有研究,台灣嘅立法院外交及國防委員會主席林郁方,就話唔使擔心咯。因為就算呢隻航空母艦起好咗,但係佢都未必出到遠洋喎!
 
林郁方話,上海同大連對出嘅海域,係日本、南韓等國家嘅領海,航空母艦要經過呢啲地方出遠洋,都唔係話咁易。而且,航空母艦要發揮佢嘅戰鬥力,並唔係單靠一艘船,除咗船上要配備先進嘅防衛同攻擊性武器,仲要同大批嘅戰鬥機、戰艦,以至潛艇一齊合作。不過,而家中國嘅航空母艦除咗係要由現成改裝外,艦上面嘅戰鬥機,係俄羅斯嘅蘇33同蘇35;而船上嘅武器、裝備、機械,絕大多數都要向俄國、德國、法國採購,國產武器設備似乎暫時仲未可以登大雅之堂。咁點解中國人可以造到太空船上太空,但係自己一手一腳起艘戰艦又唔得呢?
 
林郁芳話,呢個係因為中國嘅基礎工業太過落後!
 
林郁芳嘅講法同好多評論家一樣,都係認為中國過去太倚賴勞工密集嘅工業模式,對於新科技嘅發展停滯不前。中國或者可以傾一國之力去建造太空船,但係未必可以建造一艘戰鬥力好強嘅戰艦。
 
作為中國人,有時最希望嘅或者唔係要登陸月球,而係希望可以設計到一部安全可靠嘅跑車,或者係研究到一部穩定而快速嘅電腦。

(本聲音專欄只反映主持人及個別參與人士的個人意見。)

 
 
中國法國床頭打交床尾和
03.04.2009
免費睇動物買少見少
02.04.2009
簡約生活不簡單
01.04.2009
鬼網要小心
31.03.2009
粗口咪亂講
30.03.2009
香港駐台辦事處逼在眉睫
27.03.2009
已經有0位網友作出回應

 
姓名: 雷霆一擊小組
真名/別名: 雷霆一擊小組
生日:
星座:
 

DJ:
欄目:
     



關於商台 服務條款 私隱政策 廣告服務 使用條款 (商台節目重溫)
聯絡我們 FAQ 版權 加入我們