英超開鑼，上季亞軍利物浦主場4比1大勝升班馬諾域治，但就有正選門將艾列臣傷出。開賽7分鐘，諾域治就有隊長格蘭漢尼擺烏龍，令球隊落後0比1。利物浦打開紀錄後踢得更加順，沙拿及雲迪積克各入一球領先到3比0。到39分鐘，利物浦門將艾列臣拉傷腳，要由職員摻扶離場，由新加盟的西班牙門將阿祖安入替，利物浦無受影響，完半場前由奧歷治頭槌頂入成4比0，遙遙領先四球返更衣室。下半場，諾域治踢到中段由芬蘭前鋒迪姆普基破蛋。
今晚英超會上演6場賽事，其中衛冕的曼城會作客韋斯咸，熱刺就在主場迎戰阿士東維拉。