世界盃歐洲區外圍賽A組，葡萄牙作客3比1反勝盧森堡。葡萄牙今場踢了30分鐘先失守，到上半場補時才由祖達扳平。換邊後6分鐘，上兩仗外圍賽都無波入的C朗拿度建功，加上祖奧鮑連夏建功，鎖定贏3比1。同組的塞爾維亞，憑米祖域包辦兩球，作客2比1擊敗阿塞拜疆。

葡萄牙與塞爾維亞同樣3戰得7分，分別排小組一、二位。

E組的比利時，收起迪布尼同盧卡古，以多名副選球員上陣，主場仍以8比0狂數白俄羅斯，白禮頓翼鋒杜沙特梅開二度，布魯日中場雲拿根亦都入了兩球，並交出一次助攻，巴舒亞依及賓迪基都取得入球。同組威爾士主場1比0小勝捷克，效力曼聯的丹尼爾占士，完場前接應巴爾的傳送，頭槌攻入致勝一球。

比利時3戰有7分排小組榜首，捷克及威爾士分別有4分及3分。

而在G組，荷蘭亦都取得大勝，作客以7比0橫掃直布羅陀，其中里昂球星迪比個人梅開二度，在英超搵食的韋拿杜姆及雲迪碧克亦都有入球進帳。同組土耳其被拉脫維亞迫和3比3，挪威作客1比0擊敗黑山。

賽後，土耳其3戰得7分排小組第一，荷蘭、黑山及挪威同得6分。

最後在H組，克羅地亞3比0擊退馬爾他，效力皇馬的隊長莫迪歷射入一個十二碼，國際米蘭的比列錫亦有一入球一助攻。同組斯洛伐克2比1戰勝俄羅斯。塞浦路斯一球小勝斯洛文尼亞。

在積分榜，克羅地亞及俄羅斯同樣是3戰得6分，排首兩位。